舊話潮語剝花生 城頭睇馬最開心

[sudo]

http://www.cantonese.asia/portal.php?mod=view&aid=790

2015-5-20 21:30| 發佈者: highyun| 原作者: 謝主隆

摘要: 舊時，「阻人拍拖者」，尚有另一與「電燈膽」類似詞語，謂之「剝花生」。但今日「剝花生」經已成爲另一個意思嘅最hit潮語。

書接上一回，講開「阻人拍拖者」，尚有另一與「電燈膽」類似詞語，謂之「剝花生」。上世紀八十年代以前，民風淳樸，思想保守，男女交往好大件事。父母驚女兒蝕底畀人，通常嗌個細佬妹跟埋家姐出去玩，名爲跟隨玩樂，實則幫人做線眼，𥄫實有冇越軌行爲。阿哥阿姐卿卿我我之時，慌個細佬妹悶親，會買啲口立嗒（零食）過佢，一來等佢分散注意力，二來氹佢開心，起收買線人之效。觀乎當年之零食，無非得幾種，其中以花生最爲普遍，故此，細路哥於有情男女側根「剝花生」解悶之情景，與做電燈膽甚為相似。

正所謂今時唔同往日，一個酸梅兩個核，家吓啲細路哥有機打時又有網上，邊得閒陪你出去吹風！故此，今日「電燈膽」仲有好多，但「剝花生」就成爲另一個意思嘅最hit潮語，「剝花生」下半橛係「等睇戲」。

正所謂「倒瀉屎都睇一餐」，鍾意睇熱鬧之心自古就有，故此「剝花生」出現之前，經已有相應嘅俗語。「企喺城頭睇馬打交」正有「就手旁觀」之意。只要事不關己，幸灾樂禍睇熱鬧，於好多人而言，直頭開心到要食花生飮啤酒。