子孫後代隨父姓 緊記「老竇」係雅稱

[sudo]

http://www.cantonese.asia/portal.php?mod=view&aid=836

2017-6-18 01:14| 發佈者: highyun| 原作者: 謝主隆

父親之稱呼，古代喚「阿爹」、「阿父」，又或「阿爺」（《花木辭》「阿爺無大兒，木蘭無長兄」）；現代則有「爸爸」、「父親」；謙稱有「家父」、「家翁」……林林種種，舉之不窮。廣東話則自成一格，有仿古式——「阿爸」，西譯式——「爹哋」，更有人人識——「老豆」。

「老豆」一詞來歷，有兩支水源。

其一爲竇燕山，《三字經》有云：「竇燕山，有義方，教五子，名俱揚」。竇生乃五代後晉時期人，官至太常少卿、右諫議大夫，而最爲人樂道係佢五位公子，個個皆有成就：長子竇儀中進士，成爲翰林學士，曾任禮部尚書；次子竇儼中進士，又做翰林學士，曾任禮部侍郎；三子竇侃曾任補闕；四子竇偁又中進士，做授翰林學士，曾任諫議大夫；五子竇僖曾任起居郎。當時人稱竇氏五龍，一時傳為佳話。而竇燕山本人亦都活到八十三歲，壽終正寢。竇翁因「教子有義方」，堪稱人父之典範，故有「老竇」之尊稱。此傳說實乃文字專家容若先生傑作，而容若先生此後亦多次爲文重申「竇燕山」並非「老豆」來源。雖則如此，竇燕山故事符合眾人追求美好嘅願望，且「老竇」稱呼亦對父親有一份尊敬之意，故此竇燕山一說仍然甚有市場。

其二則與鄉音有關。子女有時會暗稱父親做「老頭子」，簡稱「老頭」。此呌法據說最初盛行於順德、南海，之後傳至省城。「老頭」以順德話讀，近似「老豆」，此發音遂漸成爲通用省城話。由於「老頭子」、「老頭」並非廣東話特有，而且聽落似乎對父親稍欠尊重，故此呢支水收視率始終不及「竇燕山」一說。

華夏數千年父系社會，男性處主導地位，子孫後代一律跟隨父姓。語言承載文化，於是乎廣東話亦有俗語「老竇姓乜都唔知」，卻冇「阿媽姓乜都唔知」，而只有「阿媽都唔認得」（此句亦有文章，另案再議）。事關老竇與你姓氏相同，若太過沉迷於某事物，就會連自己老竇姓乜都唔記得，亦即等於唔記得埋自己個名，達到「忘我」境界！

講開跟老竇姓，不能不提粵劇泰斗馬師僧代表作《苦鳳鶯憐》裏頭《余俠魂訴情》嘅經典唱段：「我姓（呀……）余，我個老竇佢又係姓（呀……）余，俠魂就係我個名字。我家中內，糧無隔宿，幾乎要做到乞兒……」《苦》劇大意講述女主角被人冤枉通姦，最後得窮困潦倒嘅男主角余俠魂相助，恢復清白，大團圓結局。男主角一出場就唱「我姓余，我個老竇佢又係姓余」，正正爲強調「我係有名有姓嘅，唔係連自己老竇係邊個都唔知嘅私生子，亦唔係要跟後父姓嘅『遊艇仔』」。呢句唱詞，確係頂天立地，有尊嚴兼有骨氣。

舊時，老竇地位何等尊貴，一家之主，一言九鼎，「嚴父出孝子」。而家，卻有「廿四孝老竇」，莫講話「在家從父」，仔女對老竇唔好一言九「頂」經已算好。做老竇嘅亦唔在乎「牛耕田，馬食谷，老竇賺錢仔享福」抑或「老竇養仔仔養仔」，只要個仔記得老竇姓乜就經已心足。世界變咯！

[恆智德]

@sudo 喺 子孫後代隨父姓 緊記「老竇」係雅稱 入面講：

此傳說實乃文字專家容若先生傑作，而容若先生此後亦多次爲文重申「竇燕山」並非「老豆」來源。

https://xsden.info/topic/895/容若-老豆其實係老頭