猜拳遊戲傳古今 口令何故曰「情尋」？

[sudo]

http://www.cantonese.asia/portal.php?mod=view&aid=838

2018-4-27 18:51| 發佈者: highyun| 原作者: 謝主隆

摘要: 小兒猜拳遊戲口令「清侵磨教叉燒包」究竟與「包剪𢱕」有何相干？

有IQ問題：王師奶教整奶黃包，陳師奶教整蓮蓉包，咁邊個教叉燒包？

答案係「清侵磨」，皆因「清侵磨教叉燒包」，經典爛gag！

「清侵磨教叉燒包」係小兒猜拳遊戲口令，其中「清侵」兩字常讀低音「呈沉」。此遊戲，南北皆有，北話呌「石頭剪子布」，廣東話稱「包剪𢱕」，玩法簡單，規則公平，且極方便，不需任何輔助工具。好多成人正規比賽亦以「包剪𢱕」決定比賽出場順序及場地選擇權。遊戲由三種手勢組成，不論「包」「剪」「𢱕」抑或「石頭」「剪子」「布」皆與之一一對應，三歲細路哥都明。之「呈沉磨教叉燒包」就頗爲費解，究竟此句說話與「包剪𢱕」有何相干？

此前，〈頻臨失傳縮脚語 轉彎講嘢最得意〉一文講過「縮腳語」，係隱去固定短語最後一個字或詞，但所要表達意思正係隱去部分。例如「茅根竹」，隱去「蔗水」，取諧音「借水」之意；又如「小心你個酸薑蕎（頭）」、「我做你個柴可夫（司機）」。而「呈沉磨教叉燒（包）」正好由三個縮腳語構成：「呈沉」查實係模擬重物跌落水之聲「呈沉——丼（dam2）」；「磨教」實情係「磨鉸」，須知「剷刀磨鉸剪」係舊時常見行業；「叉燒包」則係去茶樓必點食物，點心阿姐推住點心車，拉長聲嗌「蝦餃燒賣叉燒——包」。「呈沉磨教叉燒」正隱含「揼剪包」三字，其中「揼」與「丼」同音，再轉化爲音近義同嘅「𢱕」。

「包剪𢱕」另一個更爲流行嘅名係「猜呈沉」，一說係「猜『呈沉磨教叉燒包』」之縮寫，另一說則與兩個歷史人物有關。話說五代十國時期南漢末代君主劉鋹，係荒淫無道之暴君。宦官龔澄樞得劉鋹寵信，囂張跋扈，喺廣東一帶大肆搜掠民脂民膏，禍害甚於劉鋹。最終，宋太祖趙匡胤捉劉鋹，誅澄樞，爲民除害。民間痛恨兩人，以「搋澄鋹」作酒令慶賀。酒令內容大致爲：「澄鋹包，龔賊把頭拋。澄鋹𢱕，劉鋹要執笠。澄鋹剪，抵佢有今天……」其中「搋」有「壓、搓、撳、打」之意，「澄」、「鋹」當然係話龔澄樞同劉鋹兩人。因「搋」、「猜」同音，「澄鋹」轉化爲音近之「呈沉」，「搋澄鋹」亦逐漸轉變爲今日所講之「猜呈沉」。

現時書寫，更多人會以「猜情尋」入文，無論「情尋」定「呈沉」，皆取其音，無字可尋，亦無所謂對錯。「猜情尋」更流行，只因「尋尋覓覓，情困其中，猜其不透」，聽落更有詩意，連詞神林夕亦以「猜情尋」爲題填過歌詞。

[sudo]

@GMod 請轉文化台。應該無錯？

[XDen]

@sudo

[sudo]

@XsDenGuard 唔該