說話生猛若省港 千變萬化巧用「劏」

[sudo]

http://www.cantonese.asia/portal.php?mod=view&aid=785
2015-4-30 11:37| 發佈者: highyun

摘要: 廣東話之「劏」，原本意思係「宰殺」，以刀割開動物身體。例如東瀛人切腹自殺曰「劏肚」，高聲怪叫曰「劏猪咁聲」，吉人天相渡過危機要「劏雞還神」，歇後語「亞崩劏羊，咩都冇得咩」…… ... ...

早前，《生果日報》兩岸版某則新聞講及天津一宗車禍，標題爲：「天津大霧釀慘劇 旅巴撞限高欄劏頂兩死」。對照配相，車身遭限高欄橫向劏開，「劏頂」兩字相當形象。

廣東話之「劏」，原本意思係「宰殺」，以刀割開動物身體。例如東瀛人切腹自殺曰「劏肚」，高聲怪叫曰「劏猪咁聲」，吉人天相渡過危機要「劏雞還神」，歇後語「亞崩劏羊，咩都冇得咩」……佛山祖廟仲有嚿「劏人石」，傳說好多年前，某惡霸屈個細路偷佢屋企隻鵝食，問曰「你今朝食乜？」細路話「食螺，食螺」，由於佢甩牙，大人聽成「食鵝，食鵝」，於是乎惡霸拉咗佢老竇送官究辦，阿媽唔信自己個仔會偷人嘢，一氣之下，拉個仔去祖廟劏肚以證清白，結果細路肚中只得螺肉，而北帝神像前劏肚嗰嚿石頭就成爲「劏人石」，至今尚有隱隱血漬。此事於金庸先生《飛狐外傳》中亦有說及，成爲鳳天南與鍾四嫂嘅恩怨故事。

佛山祖廟「劏人石」

至今，「劏人」之事已極爲罕見，「劏」亦演變出更多意思，未必係「殺生」。例如低價旅遊團導遊帶遊客去購物點強制購物，嗰啲商店專「劏客」，所謂「劏客」，「好過去搶」也。「攔路打劫」，謂之「劏死牛」，皆因死牛唔識反抗，又夠大隻，任劏唔嬲，被洗劫者有如死牛一般，任人宰割。

廣東話活力非常，隨時世發展，「劏」嘅對象亦由生物轉爲死物。分間樓宇單位，又名「劏房」。香港寸金尺土，乜都要一分爲幾，間開嚟租賣，故此「劏樓」、「劏鋪」應運而生，同「劏房」一樣道理。此外，「劏」嘅物件越嚟越細，汽車拆成部件曰「劏車」，買手提電話上臺（電訊商捆綁銷售）, 然後再攞部電話去賣呌「劏機」。

講開「劏」字，尚有大把話題，另案再議，敬請留意。

[恆智德]

@sudo 喺 說話生猛若省港 千變萬化巧用「劏」 入面講：

佛山祖廟仲有嚿「劏人石」，傳說好多年前，某惡霸屈個細路偷佢屋企隻鵝食，問曰「你今朝食乜？」細路話「食螺，食螺」，由於佢甩牙，大人聽成「食鵝，食鵝」，於是乎惡霸拉咗佢老竇送官究辦，阿媽唔信自己個仔會偷人嘢，一氣之下，拉個仔去祖廟劏肚以證清白，結果細路肚中只得螺肉，而北帝神像前劏肚嗰嚿石頭就成爲「劏人石」，至今尚有隱隱血漬。此事於金庸先生《飛狐外傳》中亦有說及，成爲鳳天南與鍾四嫂嘅恩怨故事。

《讓子彈飛》六子被屈食涼粉畀唔夠錢，劏肚以證清白
https://www.bilibili.com/s/video/BV1oK4y1r7Y5

[恆智德]

加tag #劏

[恆智德]

@sudo 喺 說話生猛若省港 千變萬化巧用「劏」 入面講：

廣東話之「劏」，原本意思係「宰殺」，以刀割開動物身體。

呢個字係近代新造，最早寫成「鏜」：

• 遼朝釋行均編的《龍龕手鏡》 ‧金部「鏜」︰「音湯。以鐵貫物。」
  https://www.yuetlab.com/word/5b9e838a3a9c4b303533e6b0

不過睇返上古用例，係表示鐘鼓聲，「以鐵貫物」一說到《廣韻》（同《龍龕手鏡》成書年份接近，都係公元一千年左近）先收錄：
https://ctext.org/dictionary.pl?if=gb&char=鏜

• 《詩經·擊鼓》：擊鼓其鏜、踊躍用兵。
• 《說文解字·金部》：鏜：鐘鼓之聲。
• 《全唐詩·聖政紀頌》：磊磊其事，鏜鏜其聲。