酒醉何以劏白鶴？ 源自官話非老作

[sudo]

http://www.cantonese.asia/portal.php?mod=view&aid=787

2015-5-5 15:17| 發佈者: highyun| 原作者: 謝主隆

摘要: 形容飲酒，廣東話有好多生鬼語句，如描述飲酒豪邁，有「劈酒」、「懟酒」、「吹喇叭」等；若因貪杯飮到暈暈地甚至神智不清，曰「啤啤夫」；「啤啤夫」至失去知覺，爲之「斷片」。飲酒過多，嘔返晒出嚟，爲之「劏白鶴 ...

劏猪、劏牛、劏雞、劏鴨，甚至劏魚、劏蛇，都唔算稀奇事，之鶴就唔係咁常見，慢講劏鶴添。但有樣嘢得意，廣東人口中時時會飈句「劏白鶴」出嚟，原來拏飲酒有關。

形容飲酒，廣東話有好多生鬼語句，如描述飲酒豪邁，有「劈酒」、「懟酒」、「吹喇叭」等；若因貪杯飮到暈暈地甚至神智不清，曰「啤啤夫」；「啤啤夫」至失去知覺，唔記得當其時做過乜，爲之「斷片」。飲酒過多，腸胃難以消受，嘔返晒出嚟，乃正常反應，此爲「劏白鶴」，或簡稱「劏咗」。

醉酒嘔吐雖則傷身，但酒戒畢竟有異於殺戒，飲酒與白鶴性命何干？純屬誤會一場。查實，「劏白鶴」由官話「湯白喝」轉變而嚟，既無刀光，亦無血腥，只有酒氣。湯喺北方俗語中係「酒」嘅隱語，「湯」本指熱水，北方天氣寒冷，飲酒要用熱水溫住盛酒器皿以保持溫度。如《水滸傳》中林教頭風雪山神廟一段：「那跟來的人討了湯桶，自行燙酒」。此後，民間喜用「湯」隱稱「酒」，如《紅樓夢·變生不測鳳姐潑醋》：「下流東西，灌了黄湯，不說安分守己的挺尸去，倒打起老婆來了！」所謂「湯白喝」，就係「酒白喝」，之前飲落肚嘅酒嘔返晒出嚟，飲咗等於白飲，嘥料！

舊時，廣東人大多唔曉聽官話，聽到「湯白喝」就以爲「劏白鶴」，以訛傳訛，一直傳到而家。另一類似個案更爲人熟知，「Call Lao Ye」實乃官話「可惱也」之發音，源自京劇戲班。北人說話，粵人不明所以，亦不求甚解，依音直譯。可惱也？可笑也？照講可也。

[恆智德]

加tag #劏

[恆智德]

@sudo 喺 酒醉何以劏白鶴？ 源自官話非老作 入面講：

另一類似個案更爲人熟知，「Call Lao Ye」實乃官話「可惱也」之發音，源自京劇戲班。

以前粵劇係用中州音，整首任劍輝、梁醒波合唱嘅《高平關取級》你嘆下
https://www.youtube.com/watch?v=_PUkNz0llOI

[恆智德]

@sudo 喺 酒醉何以劏白鶴？ 源自官話非老作 入面講：

因貪杯飮到暈暈地甚至神智不清，曰「啤啤夫」

會唔會係「丿丿夫」？
「丿」係「本丿」（pe5）個「丿」，「夫」係「之夫者也」個「夫」