京劇粵化「啱河車」 北話南傳「Call Lao Ye」

[sudo]

http://www.cantonese.asia/portal.php?mod=view&aid=815

2015-9-17 16:39| 發佈者: highyun| 原作者: 謝主隆

摘要: 「啱晒河車」嘅「河車」係咪𢬿胎盤做中藥用嗰味「紫河車」？「Call Lao Ye」係咪激氣到要「call老爺」？世事邊有咁簡單。

形容事情甚合心意，可曰「合晒心意」，可曰「啱心水」，亦可語帶玩笑曰「開正我嗰範」。但粵人講嘢鍾意刁鑽，要講「啱晒我河車」至爲之最生鬼。「河車」爲何物？當然唔係講緊𢬿胎盤做中藥用嗰味「紫河車」，要解釋清楚，先從某個電視節目講起。
幾年前，cctvb嘅前身TVB有一介紹粵劇粵曲嘅節目，名呌〈合晒合尺〉。當其時，相當多人對節目名大惑不解，因爲雖則寫「合尺」，但主持人汪阿姐卻讀作「河車」。查實粵語「啱晒河車」嘅「河車」眞身正係「合尺」，而「合尺」亦正好同「大戲」（粵劇）有關。

舊時粵曲曲譜係用工尺譜譜曲。工尺譜乃中樂記譜之一項偉大發明，同五綫譜、簡譜一樣，工尺譜自成體系，有「合」「士」「乙」「上」「尺」「工」「反」七個基本音，對應簡譜嘅「5 6 7 1 2 3 4 5」，其中「合」同「尺」，分別係簡譜嘅低音「5」同高音「2」。

二胡係粵劇中嘅重要樂器，其兩條弦分別呌「合綫」同「尺綫」，正係取「5」「2」兩個音。低音「5」共高音「2」，一個聽落似陽平聲，另一個聽落似陰平聲，呢兩個音悠長平穩，通常作爲樂器嘅調音準則。當兩條綫調好音，共同發出聲音時和諧順耳，咁就稱爲「啱晒合尺」。

至於「合尺」何解變成「河車」，就要追溯返粵劇嘅發展過程。粵劇吸收相當多京劇元素，工尺譜發音亦沿用京音。「he chi」「he chi」，讀讀吓就演變成粵音「河車」。正如「Call Lao Ye」（「豈有此理」之意），實爲京劇之「可惱也」，當劇中角色嬲到吹鬚碌眼時，就爆句「可惱也」。後傳至南方嘅粵劇，之後再流落民間，反爲變成粵語獨家專有。

官話有個詞「咬弦」亦源自樂器，正好對應粵語「啱晒合尺」，都有「相互協調，和諧共處」之意，邊個更勝一籌，相信各人心裏有答案。可惜，後生一輩講話直接，言辭誇張，一味求快，「啱晒合尺」經已冇幾個人會講，取而代之嘅，係更簡短嘅新潮話「啱feel」、「啱key」。

[恆智德]

@sudo 喺 京劇粵化「啱河車」 北話南傳「Call Lao Ye」 入面講：

「Call Lao Ye」（「豈有此理」之意），實爲京劇之「可惱也」

粵語嘅「嬲」可能都係受官話影響
最早嘅粵語小説《俗話傾談》（成書於同治年間）都係用「惱」，但用法同「嬲」無異：

• 激惱
  昨朝話一句，今朝敢就花晤戴、粉晤搽、新衫唔著，想來激惱我。
  我聞娶妻所以事母，今致老母時時激惱，要妻何用。
  不關婆婆之事，總係我唔曉孝順，致激惱婆婆，自知罪該萬死。
• 惱
  存心行事惱天公，用盡好謀總是空。厚福木來富不得，依然幾次變成銅。
  我最惱不平人，等你好久，今毒打你一場，而泄此不平之氣也。
• 惱悶
  橫紋柴見二成如此，更加惱悶，染成病症。
  氣唔平，心唔服，欲殺他而不得，欲救彼而不能，而無容你惱悶也。
• 惱氣
  二成惱氣曰：“前者，我個亞哥話哈要老婆，如今又找一回點樣，對得人住，我個老母更加發憨。初時話大新婦唔好，如今作佢一個寶點樣解法，唔合我心。我要分開家產，各有各食。”
  後被橫紋柴聞之，惱氣，話珊瑚曰：“天地間有的咁樣人，冇心肝冇到極處。外母來，殺雞倍待。兩公婆唔叫老母食一件。

http://big5.quanben-xiaoshuo.com/n/suhuaqingtan/xiaoshuo.html

[恆智德]

@sudo 喺 京劇粵化「啱河車」 北話南傳「Call Lao Ye」 入面講：

官話有個詞「咬弦」

對應粵語係「咬牙(2)」？「牙(2)」係齒輪上邊嘅齒，亦指螺紋