• Citi

    http://www.cantonese.asia/portal.php?mod=view&aid=767
    2015-4-11 16:06| 發佈者: highyun|原作者: 謝主隆

    摘要: 粵語有九聲好易記,愛嚟唱歌好聽到飛起,用十以內嘅數字唱得晒出嚟……

    時時聽聞粵語有九聲,實情係邊九聲?借用同聲調漢字,爲:「芬、粉、瞓、墳、憤、份、忽、法、佛」,對應學名爲:陰平、陰上、陰去、陽平、陽上、陽去、陰入、中入、陽入。
    160214eg4tce4po164999w.gif

    心水清者發現,十以內嘅數字啱啱數得晒九聲出嚟:「三、九、四、零、五、二、七、八、六」。亦即係話,從零數到九,經已讀晒全部聲調出嚟,難怪粵語讀數字咁高低抑揚。若然仲係嫌記得辛苦,咁不妨用有意思嘅字串埋幾個聲調,例如「三點半 嚟我度 乜節目」、「中港澳 尋買賣 必發達」。
    160300h33pf53l316iyqcs.png

    有樣嘢仲神奇,「陰平」嘅「陰」字本身係陰平聲,屬於「陰聲字」,而「平」字本身係陽平聲,屬於「平聲字」,而其它嘅「上」、「去」、「入」亦分別係「上聲」、「去聲」、「入聲」,你話粵語嘅設計係何其科學,何其精細呢!

    粵語聲調豐富,同音樂天然結合,填過詞嘅人,最有體會。例如呢句歌詞:「河水彎又彎,冷然説憂患,別我鄉里時,眼淚一串濕衣衫」,以粵語讀出嚟接近按旋律唱嘅效果,但係若果用國語讀,讀完肯定唔知首歌係點唱嘅。古代嘅詩詞,往往直接唱得出嚟,特別係宋詞,根據詞牌格式填好之後,歌者就可以演繹出動聽嘅曲調,成爲當時嘅「流行曲」,粵語正正延續咗呢種聲韻特性。所以,下次有人話粵語係「鳥語」嗰陣。你不妨同返佢講,鳥語係天籟之音,講粵語就好似雀仔唱歌咁好聽,唔好咩?

  • Citi

    九音真經 :lm2xm-sosad: :lm2xm-sosad: