七月十四唔使震 「鬼」字查實好過癮

  • Citi

    http://www.cantonese.asia/portal.php?mod=view&aid=810

    2015-8-27 18:02| 發佈者: highyun| 原作者: 奀姑青

    摘要: 藉住鬼節,講吓「鬼」字,廣東話嘅「鬼」字,唔單止唔恐怖,仲相當生鬼!

    農曆七月十四盂蘭節,俗稱鬼節。藉住鬼節,講吓「鬼」字,廣東話嘅「鬼」字,唔單止唔恐怖,仲相當生鬼!

    175812ozbo3c44t3t4ozmd.jpg

    首先,「鬼」係萬能嘅,可以代替所有嘢,當搵唔到動作發起人或者接受人嗰陣時,隻「鬼」就出嚟幫你手:

    鬼唔知阿媽係女人!

    呃鬼咩。

    啲嘢賣到咁貴,搵鬼幫襯你!

    因爲「冇人唔知阿媽係女人」、「冇人畀你呃到」,亦都「冇人會幫襯你」,所以就搵隻虛擬「鬼」出嚟表示呢種人唔存在。

    180013ijmxjxd83vx8j9d0.jpg

    有時,鬼又可以用嚟做參照物:

    鬼咁靚,鬼咁醜。

    鬼殺咁嘈。

    鬼打都冇咁精神。

    鬼有幾靚?又有幾醜?鬼打有幾精神?全部冇人知,不過一出到鬼,就個個都意會到係形容最極至嘅狀態,靚就靚到極點,醜就醜到極點,因爲隻鬼摸唔到,睇唔到,你話佢點就點。

    「鬼」最大作用莫過於表達語氣:

    你好鬼靚仔!

    係咩?你都好鬼靚女啊!

    齣戲好鬼悶!熄鬼咗個電視佢啦!

    ……

    「好靚」加咗「鬼」字變成「好鬼靚」,變靚指數不亞於僆模打Botox修面;「好悶」變成「好鬼悶」,就直頭悶得死人。

    加强語氣都未算架勢,「鬼」仲識扭轉成句話嘅意思,肯定變否定,否定變雙重否定:

    啲黑朱古力有鬼好食咩。

    你識鬼咩,純度高先香啊。

    你唔好以爲自己係大明星啦,有鬼人識你咩。

    你唔好咁八卦啦,人哋屋企嘈交關你鬼事!

    ……

    「好鬼有用」、「有鬼好用」兩句說話,「鬼」字係咁意轉咗吓位置,意思就完全相反,幾鬼神奇!通曉粗口者,定必知道「鬼」實際上係某幾個粗口字嘅替代品,皆因「鬼」出得街,但「小狗懶擦鞋」就要打格仔。唔信嘅話,以上幾句說話中,「鬼」嘅位置以粗口字代入,一樣通順,兼且琅琅上口。

    180152obtlltgi5v5gv2vg.jpg

    更得意嘅係,廣東話嘅「鬼」,更多時候唔係形容鬼,而係形容人。歌神阿Sam首〈天才與白痴〉,歌詞就列舉咗一大堆咁嘅「鬼」:衰鬼、烟鬼、酒鬼、奸鬼、內鬼、賭鬼、嘩鬼、冒失鬼、醜死鬼……查實全部都系人,就連西洋人,都係「鬼」——「鬼佬」吖嘛。

    180043vhhfmlhs8mrv3zsj.jpeg

    一個「鬼」字都咁多玩法,廣東話確係㜺鬼!

  • Citi @sudo

    @sudo七月十四唔使震 「鬼」字查實好過癮 入面講:

    㜺鬼

    其實「盞鬼」可能先係本字

    「盞」可指「茶盞」:盞,《博雅》:「杯也」;郭璞注《方言》:「最小杯也」。
    自然可以延伸成形容詞,表示精緻同骨子

    「盞鬼」 = 「盞」+「鬼馬」

  • Citi @恆智德

    @恆智德七月十四唔使震 「鬼」字查實好過癮 入面講:

    「盞」可指「茶盞」

    各種茶盞精品
    alt text