七月十四唔使震 「鬼」字查實好過癮

[sudo]

http://www.cantonese.asia/portal.php?mod=view&aid=810

2015-8-27 18:02| 發佈者: highyun| 原作者: 奀姑青

摘要: 藉住鬼節，講吓「鬼」字，廣東話嘅「鬼」字，唔單止唔恐怖，仲相當生鬼！

農曆七月十四盂蘭節，俗稱鬼節。藉住鬼節，講吓「鬼」字，廣東話嘅「鬼」字，唔單止唔恐怖，仲相當生鬼！

首先，「鬼」係萬能嘅，可以代替所有嘢，當搵唔到動作發起人或者接受人嗰陣時，隻「鬼」就出嚟幫你手：

鬼唔知阿媽係女人！

呃鬼咩。

啲嘢賣到咁貴，搵鬼幫襯你！

因爲「冇人唔知阿媽係女人」、「冇人畀你呃到」，亦都「冇人會幫襯你」，所以就搵隻虛擬「鬼」出嚟表示呢種人唔存在。

有時，鬼又可以用嚟做參照物：

鬼咁靚，鬼咁醜。

鬼殺咁嘈。

鬼打都冇咁精神。

鬼有幾靚？又有幾醜？鬼打有幾精神？全部冇人知，不過一出到鬼，就個個都意會到係形容最極至嘅狀態，靚就靚到極點，醜就醜到極點，因爲隻鬼摸唔到，睇唔到，你話佢點就點。

「鬼」最大作用莫過於表達語氣：

你好鬼靚仔！

係咩？你都好鬼靚女啊！

齣戲好鬼悶！熄鬼咗個電視佢啦！

……

「好靚」加咗「鬼」字變成「好鬼靚」，變靚指數不亞於僆模打Botox修面；「好悶」變成「好鬼悶」，就直頭悶得死人。

加强語氣都未算架勢，「鬼」仲識扭轉成句話嘅意思，肯定變否定，否定變雙重否定：

啲黑朱古力有鬼好食咩。

你識鬼咩，純度高先香啊。

你唔好以爲自己係大明星啦，有鬼人識你咩。

你唔好咁八卦啦，人哋屋企嘈交關你鬼事！

……

「好鬼有用」、「有鬼好用」兩句說話，「鬼」字係咁意轉咗吓位置，意思就完全相反，幾鬼神奇！通曉粗口者，定必知道「鬼」實際上係某幾個粗口字嘅替代品，皆因「鬼」出得街，但「小狗懶擦鞋」就要打格仔。唔信嘅話，以上幾句說話中，「鬼」嘅位置以粗口字代入，一樣通順，兼且琅琅上口。

更得意嘅係，廣東話嘅「鬼」，更多時候唔係形容鬼，而係形容人。歌神阿Sam首〈天才與白痴〉，歌詞就列舉咗一大堆咁嘅「鬼」：衰鬼、烟鬼、酒鬼、奸鬼、內鬼、賭鬼、嘩鬼、冒失鬼、醜死鬼……查實全部都系人，就連西洋人，都係「鬼」——「鬼佬」吖嘛。

一個「鬼」字都咁多玩法，廣東話確係㜺鬼！

[恆智德]

@sudo 喺 七月十四唔使震 「鬼」字查實好過癮 入面講：

㜺鬼

其實「盞鬼」可能先係本字

「盞」可指「茶盞」：盞，《博雅》：「杯也」；郭璞注《方言》：「最小杯也」。
自然可以延伸成形容詞，表示精緻同骨子

「盞鬼」 = 「盞」+「鬼馬」

[恆智德]

@恆智德 喺 七月十四唔使震 「鬼」字查實好過癮 入面講：

「盞」可指「茶盞」

各種茶盞精品