何謂「行路上廣州」？ 仲有半橛係粗口

[sudo]

http://www.cantonese.asia/portal.php?mod=view&aid=782

摘要: 講開行路，年長者實曉講一句「行路上廣州」。實在「行路上廣州」係句粗鄙話，全句為……

廣東話「搭11號車」即係行路咁解，皆因「11」似兩隻腳。講開行路，年長者實曉講一句「行路上廣州」。實在「行路上廣州」係句粗鄙話，全句為「戇鳩鳩 行路上廣州」。舊時講過「戇鳩鳩 食豐收」，查實兩句話有冇關係？關係就冇，不過兩句重點都係前半橛，都係話人愚蠢。

相傳呢句俗語源自民國時期嘅省港大罷工。時維民國十四年六月，香港十幾萬工人舉行大罷工，聲明擁護上海工商學聯合會提出嘅十七項條件，並提出香港市民有政治自由、法律平等、普遍選舉、勞動立法等六項要求（咦！咪仲激過家下多多聲！）。港英當局實行緊急戒嚴同封鎖，對付罷工，引起罷工民眾憤怒，紛紛離港到廣州。港英政府初時態度強硬，下令九廣鐵路停駛，故此離港工人多數只能以步行方法返回廣州。

本來，交通工具尚未發達嘅上世紀二三十年代，以步行方式返廣州甚至更遠嘅地方，係閒過立秋嘅事，但有人笑呢班工人俾政客煽動利用，做咗人棋子都唔知，相當戇居，故此以「戇鳩鳩，行路上廣州」呢句說話嘲笑佢哋。之不過咁，今時今日，步成為健康悠閒嘅活動，香港人仲每年都舉辦「行路上廣州」，一家大細，步行回鄉，樂也融融。

順便提提個「上」字，正所謂「北上南下」，故此香港人北上，無論廣州、東莞、深圳，都係「上」，不過去東莞，而家興講「向西」。

[粵語片語料]

@sudo 喺 何謂「行路上廣州」？ 仲有半橛係粗口 入面講：

故此香港人北上，無論廣州、東莞、深圳，都係「上」，不過去東莞，而家興講「向西」

明嘅自然明
電影都有《一路向西》，Due West