戇XX食豐收 「抽筋煙」乜解究

[sudo]

http://www.cantonese.asia/portal.php?mod=view&aid=749

2015-3-29 16:46| 發佈者: highyun| 原作者: 謝主隆

摘要: 話人愚鈍，粵語每每夾雜粗口，例如笨柒加個箍、柒懵懵，揸電筒、柒吓柒吓，諸如此類。上世紀六七十年代，講得最多嘅相信係「戇鳩鳩食豐收」

話人愚鈍，粵語每每夾雜粗口，例如笨柒加個箍、柒懵懵，揸電筒、柒吓柒吓，諸如此類。上世紀六七十年代，講得最多嘅相信係「戇鳩鳩食豐收」（香港版「戇鳩鳩，行路上廣州」，另案再議）。查實後便仲有兩句：「䟴䟴腳（un un脚）食百雀，鳩流流食銀球」。押韻貪口爽之餘，更同三隻香煙牌子有關。

粵語舊時隱語多籮籮，之到而家，十之八九都經已消失。同煙有拏褦都數得出幾個，吸食鴉片煙曰「咬雲」，吸紙煙曰「咬蔃」。因為鴉片煙之煙如雲霧，故曰「咬雲」，紙煙之狀興樹蔃相似故曰「蔃」焉。

舊時人食自捲煙或水煙（「水煙筒」又稱「大碌竹」），盒裝香煙係「來佬嘢」（來路貨），西文係cigarette（細雪茄），與cigar（雪茄）相對，於是又曰「煙仔」。粵語講「整支煙仔食吓」，外江話講「抽根煙」，故粵人戲稱「抽筋煙」。

粵人鬼馬貪玩，嘗改〈義勇軍進行曲〉成粵語版：「農民伯伯踎喺街邊擔支大熟煙，前進，勞動，蜜蜂……」煙絲分兩種，其一係生晒煙，外國煙多為此類；其二係烤煙，源於華南，因此地陰雨潮濕，需用柴火烘乾煙葉，故又名「熟煙」。至於「前進」、「勞動」、「蜜蜂」等充斥「大躍進」觀感之詞語，亦係當其時甚為流行之「熟煙」品牌。