「生果」並唔同「水果」 滿漢全席知幾多?

  • Citi

    http://www.cantonese.asia/portal.php?mod=view&aid=777
    2015-4-19 21:27| 發佈者: highyun| 原作者: 五世其

    摘要: 延續「閂門、熄機、着燈」嘅話題,今回又講多一對現時多數廣府人撈亂嚟講嘅名詞:生果同水果,兩者有乜分別呢?

    滿漢全席相信好多人都聽過,係中國一種集合滿族同漢族飲食特色嘅巨型筵席,起源於清朝嘅宮廷,初初係康熙六十六歲大壽嘅宴席,旨在化解滿漢不和。後世沿襲呢個傳統,加入珍饈百味,極之奢華。講到其中有乜菜式,就唔係個個都曉嘞,事關品種繁複到淨係得極少數人念得齊晒。自從乾隆南巡之後,滿漢全席開始喺各地流行,但各地食單都不盡相同。
    212516vis5uxuk1cm31i25.jpg

    講返正題,延續「閂門、熄機、着燈」嘅話題,今回又講多一對現時多數廣府人撈亂嚟講嘅名詞:生果同水果,兩者有乜分別呢?答案喺滿漢全席嘅菜譜就有透露。許蘅嘅《粵菜存真》當中記錄咗清末兩份滿漢全席單,其中廣式膳單壓軸部分「三十二圍碟」有:

    一、四京果:酥核桃、奶提子、杏脯肉、荔枝乾。

    二、四生果:鮮柳橙、潮州柑、沙田柚、甜黃皮。

    三、四糖果:糖冬瓜、糖椰角、糖蓮子、糖橘餅。

    四、四水果:水蓮藕、水蓢蔃、水馬蹄、水菱角。

    五、四蜜碗:蜜餞金橘、蜜餞枇杷、蜜餞桃脯、蜜餞柚皮。

    六、四酸菜:酸青梅、酸沙梨、酸子薑、酸蕎頭。

    七、四冷素:酥甘面根、鹵冷白菌、申江筍豆、蠔油紮蹄。

    八、四看果:像生時果四樣,雀鹿蜂猴百子壽桃一座(看果:生果嘅雕刻品)。

    可以睇到,四生果包括鮮柳橙、潮州柑、沙田柚、甜黃皮,四水果就包括水蓮藕、水蓢蔃、水馬蹄、水菱角,所以通常喺水生嘅「果」先稱得上係「水果」,喺街市買到嘅多數係「生果」,而家周街啲人都話係水果,得返啲老人家唔會受影響照樣講生果,當然喺港澳地區,講「生果」嘅人相對多啲。

    對於四水果,蓮藕、馬蹄、菱角相信個個都好熟悉,至於水蓢蔃,廣府人通常曬乾愛嚟煲湯、煲涼茶,有清熱功效,又點解會食得呢?筆者曾經聽老人家講過,話係食水蓢蔃條苾,幾爽甜咁講。查過清朝民俗家屈大均所著嘅《廣東新語》,其中《術語·諸山果》講到:「蘋婆果,一名林檎……今遍粵中有之……一種水樃子,與相似,多生水間。或謂林擒為雄,水樃為雌。粵歌云:『水樃林檎大小同,盤中不辨是雌雄。』」係咪就係廣式滿漢全席所列嘅四水果之一呢?咁亦要另請高明指點嘞。

    香港有所謂「生果金」,即係高齡津貼,原意係畀啲錢過長者買生果、糖果食嘅福利金,所以借喻為生果金,亦唔會受大陸用語影響講成「水果金」。
    212550rv273ptouvtvo6wv.jpg

    有人或者會問:既然生果同水果係兩樣嘢,咁寫落紙係咪都應該分開呢?若果係學生哥做功課、寫作文就唔好嘞,事關你要有最壞打算,預住評分嘅先生唔知「生果」係乜傢伙,當咗你錯就弊嘞;不過平時口頭講說話、喺網上打字傾偈、同同學寫紙仔,無拘無束就應該區分嘞,畢竟係我哋母語吖嘛,既然連火星文都大行其道,呢啲傳統嘅用詞用字習慣繼續用返又有乜相干呢?

  • Citi

    加tag #近義詞

  • Citi @sudo

    @sudo「生果」並唔同「水果」 滿漢全席知幾多? 入面講:

    四生果包括鮮柳橙、潮州柑、沙田柚、甜黃皮,四水果就包括水蓮藕、水蓢蔃、水馬蹄、水菱角,所以通常喺水生嘅「果」先稱得上係「水果」,喺街市買到嘅多數係「生果」

    • 水果 = Aquatic fruits
    • 生果 = Raw fruits, no need of cooking
  • @sudo

    此回覆已被刪除!
  • @粵語片語料

    此回覆已被刪除!