氣候變化無定時 打風落雨話粵詞

[sudo]

http://www.cantonese.asia/portal.php?mod=view&aid=830

2016-8-22 17:20| 發佈者: highyun| 原作者: 塞翁失，謝主隆

摘要: 舊陣時，中文冇「颱風」，咁「颱風」點嚟嘅？

南粵夏季，天氣無常，天文臺周不時都會話「幾月幾號將會刮幾多幾多級颱風」。實質上，「颱風」一詞並冇幾耐歷史，頂櫳幾十年。舊陣時，中文冇「颱風」，唔信可以摷下中國歷朝歷代，幾百萬汗牛充棟嘅古書，經史子集、懸鄉縣記、武功秘笈……摷勻晒，「颱風」連影都冇一隻。幾百年咁遠嘅唔在講，就算幾十年前嘅民國時期，廣東飲冰子梁公啟超，喺評論《新學偽經攷》及《孔子改制攷》嘅言辭當中，都係話「火山大噴火」、「思想界之大颶風」云云。嗱，留意返，係「颶風」，唔係「颱風」。「颶風」係舊時文言嘅書面語，而廣府人口語當中，係叫「大風」、「打風」、「翻風」、「扯風」等等，點都好，口語又好，文言又好，發噏瘋都好，硬然之係冇「颱風」。

咁「颱風」邊度嚟㗎？莫非系「臺灣吹過嚟嘅風」？寫深筆字嘅人當然知道唔係，查實呢個「颱風」同廣府話淵源好深。

識英文就會知道知「颱風」英文系「Typhoon」，發音同中文極似，好多人思疑「颱風」係英文譯過嚟嘅，但若然翻查一下英文字典，字典就話「Typhoon」一字係嚟自Cantonese。原來英文「Typhoon」係鬼佬聽咗廣府話「大風」而寫出嚟嘅拼音，後嚟，呢個詞又從鬼佬把口傳到去中國嘅北方，北方人唔知「Typhoon」嘅起源，就按照北方話創造咗個新詞「颱風」去譯「Typhoon」呢個音。此乃「出口轉內銷」之典型個案。

除「大風」之外，廣府人舊時仲會稱其爲「風舊」，屈大均《廣東新語》話「南海歲有舊風。亦曰風舊。蓋颶風也。」《廣州語本字》指出，依《三國志·吳志》：「蒼梧有舊風障氣之害。風則折木轉石，氣則霧鬱飛鳥不經。」即以「折木轉石」之風爲「舊風」。廣府人將「舊風」調轉讀成「風舊」，正如「微雨」轉爲「雨溦（微）」。

講開雨，打風時必定會落雨，廣府詞彙中同「雨」有關者為數不少，如「過雲雨」、「白撞雨」、「長命雨」、「落狗屎」、「攪風攪雨」、「落雨收柴」等，但最有意思應算一系列「雨諺語」，如：

先雷後雨唔濕鞋，先雨後雷水浸街。

先雨後雷，水浸坑渠；先雷後落，唔夠洗鑊。

大暈風，細暈雨。

紅雲蓋頂，冇埞灣艇。

……

相信廣東人感受最深係呢句：「南雄落水灑濕石，去到韶關漲三尺，落到英德淹半壁，浸到清遠冇埞趯」，細緻描繪洪水嘅形成過程。

[恆智德]

@sudo 喺 氣候變化無定時 打風落雨話粵詞 入面講：

識英文就會知道知「颱風」英文系「Typhoon」，發音同中文極似，好多人思疑「颱風」係英文譯過嚟嘅，但若然翻查一下英文字典，字典就話「Typhoon」一字係嚟自Cantonese。原來英文「Typhoon」係鬼佬聽咗廣府話「大風」而寫出嚟嘅拼音，後嚟，呢個詞又從鬼佬把口傳到去中國嘅北方，北方人唔知「Typhoon」嘅起源，就按照北方話創造咗個新詞「颱風」去譯「Typhoon」呢個音。此乃「出口轉內銷」之典型個案。

有關「颱風」來源，衆説紛紜，未有定論：

https://zh.wikipedia.org/wiki/颱風
希臘神話其中名為泰風（Τυφῶν，又譯为堤丰或堤福俄斯）的泰坦，是象徵風暴的邪恶巨人。該詞在希臘語中義為「暴風」或「冒煙者」。堤豐也象徵惡風。《神譜》說它戰敗後，從身上生出無數股狂颱，專門滋害往來的海船。特指印度洋的風暴。

又有說該詞源於粵語「大風」者，因为粤语中“大风”发音为“daai6 fung1”，該詞彙經波斯語、阿拉伯語、葡萄牙語，最終传至英语成typhoon，而荷蘭語則是Tyfoon。

但據清王士禛《香祖筆記》，「臺灣風信與他海殊異，風大而烈者為颶，又甚者為颱。颶倏發倏止，颱常連日夜不止。正、二、三、四月發者為颶，五、六、七、八月發者為颱。」可見今日的「颱風」一詞，源出彼時的「颱」字。僅此一字，不太可能是音譯typhoon成“颱风”；或源自閩南語「風颱」，有人認為來自臺灣的「台」，也有人認為源自阿拉伯語。迄無定論。日文中颱風寫作「台風」，應該是中文的影響。

[恆智德]

@sudo 喺 氣候變化無定時 打風落雨話粵詞 入面講：

「南雄落水灑濕石，去到韶關漲三尺，落到英德淹半壁，浸到清遠冇埞趯」

呢四句全部都係押ek韻：sek6，cek3，bek3，dek3