誰欲埋街食井水? 可憐青樓薄命女

  • Citi

    http://www.cantonese.asia/portal.php?mod=view&aid=833

    2017-1-11 16:55| 發佈者: highyun| 原作者: 謝主隆

    摘要: 「埋街」、「妓女」、「南音」之間有何關係?

    《胭脂扣》入便,如花有句對白:「只希望埋街食井水,有住好人家」。想解通「埋街食井水」,就要「講舊史」。

    清朝至民國,省城廣州妓寨(院)盛行,且因河道縱橫,妓院多以花艇方式經營,故此「召妓」又有「開廳踏艇」之雅稱(陸上謂之「開廳」——所謂嘅「執寨廳」,河上謂之「踏艇」——紫洞廳上飲花酒)。艇上妓女,終年漂泊,居無定所,平時只能飲用河水。粵語「埋岸」、「埋街」都有船艇靠岸之意,妓女上岸,唔再賣身賣笑,即「從良」也。

    164928l3dgmr93yeakhd06.jpg

    廣州花舫

    而要「食井水」,必須有固定居所,能隨時飲用乾淨清甜嘅井水,暗喻「成家爲人婦」,亦有「從此乾淨也」之意。所以「埋街食井水」就係「青樓女子搵到一戶正當人家爲其贖身,得以從良爲人妻妾,脫離風塵」。此乃大多數妓女終生嘅心願,奈何畢竟難獲社會主流接受,大戶人家尤其鄙視風塵女子,能如願食得井水之妓女,百中無一。青春有限,年老色衰之後,風塵女子大多貧病終老。而大多戲劇如《胭脂扣》者,更加多幾分悲劇色彩,女主角往往紅顔薄命,憂憤而死。

    165109f0utytxo4epsoueu.jpg

    《胭脂扣》中,十二少同如花雙雙殉情

    現代尋歡第一誡條爲:「絕不能愛上妓女」。但舊陣時,卻有好多才子愛上青樓女子嘅故事,其中南音就頗多呢類題材,亦時時出現「埋街」一詞。如:

    《大鬧廣昌隆》中女鬼小喬哭訴自己淪落煙花巷,又被薄情郎騙去贖身錢之遭遇:「我見佢人才生一表,奴奴向佢極心飄。我同佢訂下三生之約埋街市,把白銀六百兩交佢同我別娼寮。」

    南音經典《男燒衣》,講一男子愛上歌妓,歌妓因錢債而自盡,男子得悉此事,於舟上燒衣祭奠亡人。其中一句:「可恨當初唔好,早日帶妹埋街,免使你在青樓多苦捱,咁好嘅沉香都當作爛柴……」何其悽切!

    165139ph0i7vwv7g070i7x.jpg

    梁漢威演唱《男燒衣》

    有《男燒衣》,自然有《女燒衣》(又名《老舉問米》/《妓女痴情》),講述妓女楚英對身故恩客念念不忘,去搵問米婆通靈覓愛郎蔣金良,其中有一句:「你想跟佬埋街就容乜易,姨娘共你揀個好相知。係啦,揀個有功名有面子,眉清目秀就好男兒。」附帶提下,之前有專文講過「老舉」與「妓女」之關係,有興趣可睇返。

    165406aj2rkmk3qu5z2845.jpg

    妓女從良,尚有一種講法「念五両」。皆因「廿」亦可讀「念」音,以一斤爲十六両計算,「廿五両」即一斤九両,「斤九」諧音「跟狗」,實質係妓女戲謔恩客爲狗嘅玩笑之詞。

  • @sudo

    @sudo誰欲埋街食井水? 可憐青樓薄命女 入面講:

    粵語「埋岸」、「埋街」都有船艇靠岸之意,妓女上岸,唔再賣身賣笑,即「從良」也。

    而家都有「上岸」一說,大概意思就係捱咗咁耐終於賺夠,可以癱唞吓享吓清福


  • @sudo誰欲埋街食井水? 可憐青樓薄命女 入面講:

    妓女從良,尚有一種講法「念五両」。皆因「廿」亦可讀「念」音,以一斤爲十六両計算,「廿五両」即一斤九両,「斤九」諧音「跟狗」,實質係妓女戲謔恩客爲狗嘅玩笑之詞。

    呢個gag真係又食字又燒腦,掟幾個彎 :hkgxm-adore: :hkgxm-adore:

  • @sudo

    @sudo誰欲埋街食井水? 可憐青樓薄命女 入面講:

    如花有句對白:「只希望埋街食井水,有住好人家」

    呢度「住」當量詞使?應該變讀 zyu3?


  • 鹹濕:人之性情言語舉止衣服,帶有鄉下土氣,而性喜看婦女者

    呢本書應該民國出版?
    以前d報紙佬又9up話「鹹濕」係講d地盤佬身水身汗就走去叫雞?
    甚至有話源自英文hamshop?

    國師仲有篇長文咬文嚼字
    https://hoball.wordpress.com/2009/06/30/陳雲-鹹濕/