舊派話法學到足 沙盆打爛有頭「篤」

[sudo]

http://www.cantonese.asia/portal.php?mod=view&aid=824

2016-5-9 18:30| 發佈者: highyun| 原作者: 謝主隆

摘要: 行上架巴士，見到最後排有吉位，你會點告知同行友人？「車後邊有位」？「埋便有位」？打爛沙盆又有乜好問？

行上架巴士，見到最後排有吉位，你會點告知同行友人？「車後邊有位」？欠妥，因「車後邊」係講緊部車嘅外便對住支尾氣喉嗰處。「埋便有位」？未夠準確，行入兩步都算「埋便」。若然有人曉講「最篤有位」或者「行到篤有位」，咁就要畀個「叻」喇。

根據〈說文〉，「篤」只係形容馬行得遲鈍，同「行到落duk1」意思爭好遠水路，只係借音字。[duk1]與人體有關，寫「䐁（月豖）」更近磅。「䐁（月豖）」解作「臀部」，準確講係尾龍骨盡頭，同「頭」相對，所以上一勻講及嘅「無嚟頭尻」查實仲有個老友「無嚟頭䐁」。

「臀部」嘅「䐁」引申出「最底部，最尾部」嘅意思。有句俗語，一般人以爲寫「打爛沙盆問到篤」，皆因佢哋心目中構造出如下情景：有人見到打爛咗個沙盆，就會問幾十個問題，諸如「幾時打爛㗎？」「邊個打㗎？」「點打爛嘅？」「打爛咗點算？」等等，問到你怕。查實原本唔係「問」，係「璺」。「璺」係器皿破裂嘅裂紋，見過沙盆嘅人都知道，一旦受到撞擊裂開，條裂紋就會一路裂到落底部，直至成個沙盆爛開爲止。既然形像描繪「尋根究柢」精神，於是寫爲同音嘅「打爛沙盆問到篤」，亦錯有錯着。

「䐁」有異體字「㞘（尸字頭下一個豖）」，「䐁」、「㞘」兩字，一個「月（肉）」部，一個「尸」部，均與身體有關。「䐁」嘅隔籬鄰舍「臀部」另一個稱呼「屁股」亦如此，一個「尸」部，一個「月」部。亦有人認爲寫成「叾（「了」下着個「口」）」同「𡰪（「尸」下着個「口」）」都啱。香港有個地方呌「大美督」，因爲位於新界東部八仙嶺龍脈嘅末端，因此呌「大尾叾」，後嚟乾脆雅化成「大美督」。據說，舊時啲人係寫「大尾叾」或者「大尾叾」，有興趣者，不妨踩單車過去探究吓。