伙記慢打鑼

[sudo]

http://www.cantonese.asia/portal.php?mod=view&aid=747

2015-3-29 15:42| 發佈者: highyun| 原作者: 謝主隆

摘要: 清末民初，廣州商貿繁榮，吸引各地江湖人士，其中不乏賣武賣藥者。大笪地上打鑼打鼓，嘈到拆天，行人哄晒過嚟，師傳就出場，第一句梗雞係：「夥記慢打鑼！」 ... ...

「夥記慢打鑼！打得鑼多鑼吵耳！打得更多夜又長。」呢幾句說話，相信你未講過都聽過。

清末民初，廣州商貿繁榮，吸引各地江湖人士，其中不乏賣武賣藥者。大笪地上打鑼打鼓，嘈到拆天，行人哄晒過嚟，師傳就出場，第一句梗雞係：「夥記慢打鑼！」打鑼手足一聽，即刻收鑼，全場靜晒，師傳就開始同一位徒弟唱雙簧：

「打得鑼多鑼吵耳！」「炒豬耳！」「打得更多夜又長。」「炒豬大腸！」「洪劉蔡李莫，係廣東嘅五大名家。」「攞嚟炒明蝦。」「細路哥企定咪兩頭走！」「冬菇蒸雞南乳豬手！」「一聲鑼鼓震四方。」「五湖四海把名揚」……

以上內容，純屬即場發揮，但求押韻，不過「打得鑼多鑼吵耳」同「打得更多夜又長」呢兩句就奉旨走唔甩雞。開場白講完，就開始表演，耍套路、打關斗、武槍弄劍、心口碎大石、槍頂喉嚨，樣樣都齊。

相傳有另一版本仲加抵死：

「夥記慢打鑼，打得鑼多鑼炒耳，打得更多夜又長，食得飯多肚又漲，飲得茶多夜尿長。各位父老鄕親，今日借貴方一塊寶地落腳，唔係為咗賣招牌，又唔係為咗賣藥，賣嘅係我哋師傳，我哋師爺好辛苦，走上去娥媚山頂，七七四十九日，煉咗一底大柒蠄蟝膏藥，貼落腰骨，漏落屎忽，貼落肚臍，漏落X……」

賣武係假嘅，賣藥搵錢至真。當戲做完，藥賣完，佢哋就會繼續去其它地方搵食。

「夥記慢打鑼」，表面睇落係叫夥記收鑼，實際係想提醒衆人：「好戲就嚟開始」。本專欄頭炮長篇講述此句說話，實在係想提提各位老友記：「『廣府話趣』一開，郇嘢陸續來」。