九音真經 :lm2xm-sosad: :lm2xm-sosad:
五月水漲扒龍船 俗語勿忘須承傳
-
http://www.cantonese.asia/portal.php?mod=view&aid=835
2017-5-30 03:14| 發佈者: highyun| 原作者: 謝主隆
摘要: 五月節有兩大習俗仍不可或缺,一曰「食糉」,一曰「扒龍船」。除食之外,查實「扒龍船」更多文化內涵,亦引申出若干廣東話俗語及字詞。
戰國年代,有姓屈名原者,文才過人,奈何痴心錯付,愛國(君)不遂,被奸臣所屈而冇得撈,鬱住鬱住,最終投江自盡,世人爲紀念此君而設「端午節」,又稱「五月節」。此爲最多人相信嘅「端午節」來歷,皆因古仔夠吸引。亦有人認爲端午節與惡日(農曆五月,因仲夏瘟疫流行而得名)驅瘟避疫嘅習俗有關。
時至今日,五月節有兩大習俗仍不可或缺,一曰「食糉」,一曰「扒龍船」。論及「糉」,最流行一句俗語莫過於「未食五月糉,寒衣唔入櫳」,每年都有人炒冷飯解畫,此處不再重複。除食之外,查實「扒龍船」更多文化內涵,亦引申出若干廣東話俗語及字詞。
「船」、「艇」之別——「船」較大,設施較爲齊全,「艇」較細,較爲簡陋。公園遊湖嘅呌「艇」、「艇仔」,過大海嘅係「客船」、「水翼船」。
「屎艇快過龍船」——舊時城市糞便會運往四鄉肥田,因南番順河網發達,運送工具多爲艇仔,俗稱「屎艇」。「屎艇」裝滿「肥料」時,成條河道臭氣遠播,撞正順風,殺傷力更大,由此得「順風屎艇——快夾臭」之歇後語。若然有龍舟遇着屎艇駛來,爲免臭氣侵襲、穢物沾污,必定避讓,等佢順風而過,故此有「屎艇快過龍船」之說。
「撐屎艇」——部首「辶」、「廴」,廣東話稱「撐艇」,甚至「撐屎艇」。取此名純粹因形象相似,相對於「走之底」,更直觀易明,亦可見嶺南水鄉一帶,艇係何其普遍嘅搵食架生。
「撐」、「扒」、「棹」、「划」之別——驅動船、艇嘅動作,至少有四個,其中「劃」非廣東話專用。另外三個字,意思各異:當隻艇行於淺水水面,要用條長竹撐落水底,藉此推艇向前,此爲「撐船」、「撐艇」;槳喺船(艇)側邊向後推水謂之「扒」,一般艇仔通常用兩只槳扒,仲多數都係一人揸兩槳打交叉扒;細船或者艇仔要轉彎時,通常以槳喺船尾或接近船尾位置左右擺動以掌控船艇方向,此動則作爲之「棹」。因端午扒龍舟係鬥快,船上大部分人只需出力,唔使考慮方向,故此自然係「扒龍舟」而唔係「棹龍舟」。
「龍舟水」與「西水大」——農曆四、五月正值端午前後,係廣東雨季,珠江流域暴雨頻繁,河水暴漲,於是此期間嘅降雨稱爲「龍舟水」。而廣東三條河流北江、東江、西江,其中西江嘅洪水最猛,影響廣州最大,因此每當水浸街,就有「西水大」一說。
代表五月節嘅音樂,相信非〈賽龍奪錦〉莫屬。有詞人爲純音樂配上粵語唱詞,描述龍舟競渡之場面,並由佛山名伶梁玉嶸演唱。端午當日附上此曲作應節之用。
另外,幾十年前經已有人以此曲改編成另一版本諧趣粵語詞,雖與龍船無關,但歌詞甚諧趣,睇完一笑無妨:
〈賣菜歌〉
為求賺兩餐 隨街去賣菜
白菜 绍菜 重有西洋菜 玻璃生菜以及塘蒿腐菜
芥蘭菜心 仲有香芹菜 貨色新鮮睇見都喝彩
大檔擺開 任你挑選 各位有幫襯就嚟莫走開
每斤賣個零啫 微利也無礙
(白:微中取利,抵買抵食架老友)
新出菠菜豆苗喫落甜滑附韭菜
擔兩斤半大椰菜 畁返兩文乾脆切開
幫襯我 呢一個賣菜盤你望發財你就發財 總也鴻運到來
(白:幫襯下啦先生阿大嬸呀,認真又平又靚㗎)
芥蘭個六 抵食過西生菜
啲菜心個三啫 冇將價改 實際平賣
盼大衆前來 搵返多少米飯錢就覺得心開
(白:公平交易,求其賺多少就算㗎喇喂小姐,先生呀,幫襯下啦)
剛啱一鎅發袋 啲西芹與辣椒洋蔥元荽韭菜 睇見即刻令人愛
蘿蔔醃酸炒鴨片 其實更加精呀彩
快手買啦塘蒿靚白菜 最抵買正式乾飛嘅紹菜
廟街阿姑 同福阿彩 如果仲買菜 必須買新鮮嘅菜
明碼實價幫襯就快行來 咪避開
-
@sudo 喺 五月水漲扒龍船 俗語勿忘須承傳 入面講:
未食五月糉,寒衣唔入櫳
櫳:舊底用「槓」字,如「箱槓」。亦作「槓箱」(槓箱在婚禮時用於運送體積較小的生活用品,表面雕刻有喜慶吉祥的圖案。)
https://jyut.net/query?q=槓 標明lung5,見於1856年《英華分韻撮要》李碧華《霸王別姬》:簡陋的砌末、戲衣、箱槓,隨咿呀一響,木門打開時,如常地映入眼簾。 太陽光線中漫起灰塵。
櫳字幾個意思都唔關箱事:
https://pedia.cloud.edu.tw/Entry/Detail/?title=櫳[名] 畜養禽獸的籠子。《廣韻.平聲.東韻》:「櫳,檻也,養獸所也。」
[名] 窗戶、窗牖。《文選.謝惠連.七月七日夜詠牛女詩》:「落日隱檐楹,升月照簾櫳。 」
[名] 房舍。唐.韋莊〈荷葉杯.絕代佳人難得〉詞:「碧天無路信難通,惆悵舊房櫳。」 -
@恆智德 喺 五月水漲扒龍船 俗語勿忘須承傳 入面講:
櫳:舊底用「槓」字,如「箱槓」
不過「槓」字點睇都似都係棍、橫木,唔係箱
無論「槓」(明清用字)定「杠」(本字)都同箱唔拉經(laa1 gaang1)反而「箱籠」就好多用例
《西遊記》:又將那各房頭搬搶出去的箱籠物件,從頭細細尋遍,那裡得有蹤跡。
《金瓶梅》:張四羞慚歸家,與婆子商議,單等婦人起身,指著外甥楊宗保,要攔奪婦人箱籠。
《封神演義》:弟兄二人聽得家中紛紛然鬨亂,走出庭來,只見家將扛抬箱籠,問其緣故,家將把棄關的話說了一遍。 -
@恆智德 喺 五月水漲扒龍船 俗語勿忘須承傳 入面講:
「箱籠」就好多用例
字典特登標明讀上聲
又《廣韻》《正韻》力董切《集韻》《韻會》魯孔切,音攏。箱籠。
https://ctext.org/dictionary.pl?if=gb&char=籠
-
說話生猛若省港 千變萬化巧用「劏」
文化台 • sudo • • 恆智德 • • 1 4 1679 -
古代已盛龍陽癖 「契弟」原來係男色
文化台 • sudo • • 恆智德 • • 0 2 824 -
民國單車告白話舊時粵語
文化台 • sudo • • 恆智德 • • 2 21 2778 -
斯文男子生鷄精,密實姑娘假正經
文化台 • sudo • • 恆智德 • • 2 9 1868 -
四四六六拆唔掂 反轉豬肚實開片
文化台 • sudo • • 港產片語料 • • 1 3 833 -
有嘢留返拜山講 清明時節掃墓忙
文化台 • sudo • • 舊使用者 • • 1 3 1162 -
舊文+評論重溫:中國大陸的簡體字
文化台 • sudo • 1 1 620 -
子孫後代隨父姓 緊記「老竇」係雅稱
文化台 • sudo • • 恆智德 • • 0 2 647 -
猜拳遊戲傳古今 口令何故曰「情尋」?
文化台 • sudo • • sudo • • 1 4 782