講嘢斷句更搞笑 度gag玩人有新招

[sudo]

http://www.cantonese.asia/portal.php?mod=view&aid=808
2015-8-4 17:26| 發佈者: highyun| 原作者: 謝主隆

摘要: 你老母臭……？你做乜撚……？你老母過咗身……？稍安毋躁，玩緊「續字創作」斷句gag啫。

睇過《九品芝麻官》都會記得，「公堂審案」一場，包龍星獲得「准提老母」特權後，用盡「老母」，窒到太監李連英誒都冇得誒：「你老母湊……大你咁辛苦，你走去做太監，是為不孝，唔尊重老佛爺，是為不忠，你個不忠不孝嘅死人妖，坐喺度䟴䟴腳做咩呀？」。「湊」後稍作停頓，令人即時諗起某句粗口，但聽埋後半橛，旋即得啖笑，相當啜核。周生呢種玩法，早於《他來自江湖》就出現過，何金水對住街口豆腐娟講：「成日嚟食你啲豆腐……花呀咁，點好意思呀！」「食人豆腐」，即嗍油，「佔人家便宜」，此處可謂一語相關。

斷句gag，又呌「續字創作」，將粗口或咒人嘅說話加以修飾延長，初初聽落以為講衰嘢，聽完先知原來係好普通嘅一句說話。例如「你做乜撚化我」，若然喺「撚」之後停一停，就實玩到人。呢種玩法查實一早就有，舊時仲係細路哥之間嘅語言遊戲添，其中最完整版本大致如下：

自從你阿媽過咗身（新）……加坡 ，你老竇就學人食煙……仔餅， 跟住喺天臺見你大家姐學人跳樓（扭）……腰舞，之後響廟街見到你個妹學人做雞…….蛋仔， 跟住又睇到你沖涼……茶飲 ，見到你大哥喺度搞基（機）……關槍， 跟住你細佬學人玩大麻……繩，之後你二哥入廁所食屎（史）……路比糖，跟住你三哥成日同二家姐上床……執被， 你屋企就咁冇晒生命……麵包， 最後成家就冇晒幸福……傷風素。

[恆智德]

@sudo 喺 講嘢斷句更搞笑 度gag玩人有新招 入面講：

周生呢種玩法，早於《他來自江湖》就出現過，何金水對住街口豆腐娟講：「成日嚟食你啲豆腐……花呀咁，點好意思呀！」

https://www.youtube.com/watch?v=OJ-OwoZozAok1W (Invidious)

[恆智德]

@恆智德 《功夫》入邊包租公都係噉博懵
https://www.youtube.com/watch?v=SwzjlhOjXeA (Invidious)