http://www.cantonese.asia/portal.php?mod=view&aid=748
2015-3-29 16:35| 發佈者: highyun| 原作者: 謝主隆
摘要: 民國19年〈越華報〉朱棟單車行告白。留心字句「名嚜」、「咪芝蓮」（Michelin）、「每架」。
民國19年〈越華報〉朱棟單車行告白。留心字句「名嚜」、「咪芝蓮」（Michelin）、「每架」。
「嚜」今寫「嘜」，實為英文mark之音譯。近年，有廣州電視臺舉辦粵語唱歌比賽，居然以「嘜（麥）王爭霸」為名，實在令人拗晒頭，究竟金龜嘜贏抑或獅球嘜贏？「咪王爭霸」唔出得街咩？
至於「咪芝蓮」，正是家下出版〈米芝蓮指南〉教人搵美食嘅法國知名輪呔製造商米芝蓮公司，國語呌「米其林」。
舊時，單車仲係一「架」「架」，收音機係一「部」「部」，大戲先係一「臺」「臺」。家陣，單車變成一「臺」「臺」，連手提電話咁細部都斷「臺」計。
講返單車，好多老餅字句：「seat」、「鏈冚」、「鏈餅髀」、「嗹鐘」、「斜通」……上世紀六七十年代，有句說話好流行，講及國內三隻單車名「嘜」：「鳳凰襟靚，永久襟掟，五羊生腥」，「腥」即「鏽」也。當其時有架單車仲威過家下揸benz，不過日踩夜踩，用得十年八載，例必變「錢七」。
@sudo 喺 民國單車告白話舊時粵語 入面講：
鳳凰襟靚，永久襟掟
襟：本字可寫成「禁」或「堪」
禁 kam1 https://jyut.net/query?q=禁
堪：古屬「溪母」。「唐李義山」的《義山雜纂》「須貧」條除了開列「家有懶婦」、「多輸愛賭」「致貧」之事外 , 還有「漫藏貯不堪物」一事 。「不堪」就是「不耐用」。
@親衛隊 seat seed字面上當然唔同，
不過如果都用粵語發音規律來讀，
讀出來嘅音都係sit1，兩個分唔到
比如seed，我估你應該都唔會特登讀成英語正音？
@恆智德 好似兩個唔同喎😂
「咪」呢個字解嘅意思太多，其實有冇可能換過第個字
@玭玻邦 如果用返mai音，新字都極大機會同「米」有關
https://jyut.net/search?q=mai
其實「係咪」應該對應「係未」？
@恆智德 喺 民國單車告白話舊時粵語 入面講：
襟：本字可寫成「禁」或「堪」
禁 kam1 https://jyut.net/query?q=禁
舊時粵曲都係用「禁」
https://xsden.info/post/12030
@恆智德 「係唔係」
@玭玻邦 都係一種解釋 
@玭玻邦 我都覺「係咪」係讀快咗嘅「係唔係」。
好似「可唔可以」同「可摸耳」
@恆智德 吓？……呢個幾乎係最直白嘅解釋喇啩……
@恆智德 「你咪走！」個「咪」係點嚟先難估
@玭玻邦 確實，我原先仲恁住有無可能係「未」受前邊「係」影響，ei變ai
@玭玻邦 極可能係「勿」
清同治年間粵語話本《俗話傾談》入邊有大量例子：
http://big5.quanben-xiaoshuo.com/n/suhuaqingtan/1.html
黃老師探討過從at到ai嘅音變：
https://www.yuetlab.com/word/5bab0c79371af46c17c47b9d
@恆智德 佢舉嘅嗰啲例唔係粵語特有嘅，唔係呢個時代嘅「音轉」。類似「尉」呢啲係入聲同埋所謂嘅次入聲之分，上古分屬-d同埋-ds尾，發音接近，所以用唨同一個字嚟標音。後尾中古-ds就變成-i（去聲）。呢啲好早就演變唨㗎喇，噉樣論證有啲無裏頭
就近代粵語嚟講，冇乜at變ai嘅例，所以雖然我覺得寫「勿」都唔錯，但當佢係訓讀多過當本字嚟睇。