http://www.cantonese.asia/portal.php?mod=view&aid=820
2016-1-21 17:12| 發佈者: highyun
摘要: 粵劇戲臺語言，對民間影響甚大，如「首本名戲」（拿手好戲）、「打眞軍」（喺臺上用眞刀眞槍表演武戲）、「爆肚」（即興講嘅臺詞）、「戲棚官話」（唔鹹唔淡）、「戲臺跑馬」（走人）等大量俗語、隱語，至今仍流行於 ...
近期，「粵劇」及「紅船」字眼又再觸動衆人神經。粵劇以「紅船」借代，可追溯至十八、十九世紀。當時戲班以船爲交通工具，巡迴於兩廣河道間演出。戲班船隻，船身多髹成紅色，故得「紅船」之名。紅船唔單止運載戲班成員以及戲箱行李，更爲戲班成員食宿之所，故此類戲班皆稱「紅船戲班」。紅船船艙臥鋪分配及工人職責皆有規定，成爲日後戲班之基礎。
粵劇戲臺語言，對民間影響甚大，如「首本名戲」（拿手好戲）、「打眞軍」（喺臺上用眞刀眞槍表演武戲）、「爆肚」（即興講嘅臺詞）、「戲棚官話」（唔鹹唔淡）、「戲臺跑馬」（走人）等大量俗語、隱語，至今仍流行於省港各地，玆列舉數例以說明：
Call Lao Ye、何車
此前有專文詳述，請回帶睇返〈京劇粵化「啱河車」 北話南傳「Call Lao Ye」〉。
頂櫳、爆棚
舊時，做大戲嘅固定戲院以「趟櫳」做門。入場時，戲院員工拉開趟櫳，守住入口查戲飛。當坐位飛賣晒，就賣企位飛，若然齣大戲受歡迎，企位都滿晒，逼人逼到去戲院入口，觀衆背脊頂住趟櫳。故此「頂櫳」即「滿座、去到盡」咁解。
「頂櫳」嘅老友係「爆棚」。戲班週時去唔同地方演出，冇固定戲院嘅地方，要臨時搭棚。若果入場觀眾多，就好似逼爆戲棚咁，相當形象。
撞板
粵曲演唱有「叮」有「板」，演唱時不合叮板，俗稱「撞板」，演出時「撞板」，就如今日歌星唱歌甩嘴、甩beat兼走音，非常棹忌。相傳「萬能老倌」薛覺先向來以發音跌宕、板路穩健著稱。有一次，某粵劇大老倌與薛覺先同演〈穆桂英〉，返到後臺，老倌請教薛覺先：「揸叔，我今晚做得點啊？」薛覺先話：「你掃掃埋埋，返去可以間一間房喇。」衆人不解，老倌更不解。薛老揸解釋道：「你今晚嗰段中板完全唔啱板，跌到成臺都系板，掃埋晒地下啲板返去咪够間一間房囉。」
煞科
相傳始於元雜劇，傳至粵劇。劇中最後一首曲叫煞尾，尾二、尾三嘅分別叫一煞﹑二煞。而「科」則係劇中角色之動作表情，引申爲情節。加埋一齊，「煞科」即係最後一段，亦即「完結」。
棚尾拉箱
演員剛退場就急住裝箱，未等謝幕就從戲棚後面（棚尾）匆忙離去。通常形容因臨時有事而中止活動並緊急撤離。
二花面頸
指脾氣、 性格急躁暴烈之人。因二花面多演張飛、李逵此類性格火爆人物。頸，有「脾氣」之意。
二皮老倌
二皮老倌，即二線演員，做唔到主角。引申爲生活中不能當家，冇决定權（唔做得主）。
七姐翻宮裝
〈仙姬送子〉戲中，眾仙姬所穿着戲服能當場翻轉變成另一種顏色。寓意某人好多花招，花樣諸多。
八仙賀壽
〈八仙賀壽〉乃往時戲班日場獻演嘅一齣折例戲。比喻循例搬演舊故事，冇嚟新意，又指表演簡單、重複。
大板凳
即「位位坐得」，指能演多種行當，但通常冇特別精通一門技藝嘅演員。
通臺老倌
有多種技藝嘅人，即「樣樣都掂」。從前草臺班演戲、奏樂只有幾個人，工夫隨時可以互調，名爲「六場通透」，叻過「大板凳」好多。
石屎樓
即「冇叮冇板」, 比喻演唱毫無節拍。石屎樓，指鋼筋水泥結構嘅樓房，冇鐵釘，冇木板，「釘」諧音「叮」。
大拉扯
指專門負責打雜之人。「大拉扯」屬十大行當中嘅雜行。雜，表演行當之一，專演戲中閑角。
小生叫正旦
戲棚官話「母親」二字音近廣州話「冇錢」，以此諧音「冇錢」之意。
大花面繳眼淚
「繳」即「抹」。花面行當化妝，臉上塗抹好多油彩，容易揩混，因此表演時若有抹眼淚情節，只能離開臉詐諦抹，手、臉必須保持距離，以免「花上加花」。泛指生活中人、事差距甚大，即「離行離迾[laat6]」。
開場鑼鼓
即「熱鬧一番」也。早期戲班演戲爲招徠觀眾，開場前先打一番鑼鼓，又叫「鬧臺」，也起到靜場嘅作用。有興趣可回帶睇返〈夥記慢打鑼〉一文。
六國大封相
該劇排場衆多，展示全班陣容。固有「熱鬧好戲」、「乜都出齊」之意，常見於形容爭吵激烈，場面近乎不可收拾之情形。
大開門
大開門，粵劇吹奏牌子曲，用於歡欣、熱鬧的場面。指彼此態度，和藹可親，一團和氣。
上白米
上等白米冇米糠，「糠」 諧「腔」音。比喻唱功拙劣，腔口不佳。
白鼻哥考試
古裝戲中白鼻醜生演科場落第時，口中道白：「今科不中，下科再來。」表現其不知羞恥之態。原指不學無術、考試落第之人，引申爲「聽丟架，等出醜」之意。
粵語同大戲，渾然一體，密不可分，若違逆常理，以其他語言灌入廣東大戲，則如詩所云：
強將北話唱南戲，從此難知粵韻美。
千年積澱成瑰寶，相煎非要連根起？
加tag #粵劇
@sudo 喺 粵劇溯源眞‧紅船 幾多俗語得流傳 入面講：
相傳「萬能老倌」薛覺先向來以發音跌宕、板路穩健著稱。有一次，某粵劇大老倌與薛覺先同演〈穆桂英〉，返到後臺，老倌請教薛覺先：「揸叔，我今晚做得點啊？」薛覺先話：「你掃掃埋埋，返去可以間一間房喇。」衆人不解，老倌更不解。薛老揸解釋道：「你今晚嗰段中板完全唔啱板，跌到成臺都系板，掃埋晒地下啲板返去咪够間一間房囉。」
呢句夠嗮潤 