電母舊底稱「攝爧」 雷公自古得人驚

[sudo]

http://www.cantonese.asia/portal.php?mod=view&aid=831

2016-8-22 18:46| 發佈者: highyun| 原作者: 塞翁失、謝主隆

摘要: 「風雷雨電」四大當家，講完「風雨」，點少得「雷電」。

前文再續，書接上一回。打完「風舊」，落完大雨，係時候講埋「行雷攝爧」（有說「攝」本字爲「霅」。「霅」有「涉」音，依《說文》，即是「霅電」。「爧」讀「嶺」]）。舊時廣府人講「攝爧」亦即現時書面行文之「閃電」，「爧」字《廣韻》解做「火光貎」，意即「望落如天上着火發噉」。「電」共「爧」實情講緊同一樣嘢。須知道，雷聲長，電光快，廣府話「行雷攝爧」兩個動詞正正反映此自然現象：

「行」 字陽平聲，發音時間長，低沉有力，感覺如行雷時「轟隆隆」之狀；而官話「打」字，發音上揚，頭重腳輕，飄忽無力，無論形象或氣勢均稍遜一籌。

「攝」字爲入聲，發聲時間短促，有不及掩耳之勢。而「閃」字係上聲，發聲時間長，有欠貼切。再加「攝」字有「震懾」意味，一下「攝爧」，仿似「攝」走人三魂七魄。廣府話之生動鬼馬可見一斑！

科技落後年代，常人冇法子解釋雷電雲雨現象，於是作出「雷公」、「電乸」等滿天神佛，加之嫉惡如仇心態，就視雷電劈死人之自然現象神化爲上天懲罰壞人。神話中之「雷公」法力無邊，行動迅捷，電光之下，壞人無所遁形，要匿到「冇雷公咁遠」怕且要十萬八千里之外。

法治文明未曾普及之時，以「雷公」等神佛震懾壞人，有助維持社會治安。當前科學昌明，雖則人人皆知世界上冇雷公，然而法治仍未得以完全彰顯。盜賊如毛，騙徒無數，偷搶傷人、老千天仙局屢見不鮮，更可悲者，有毒食物多過正常食物，敬畏神靈之心已蕩然無存，究竟社會係進步抑或退步？

除以神佛解釋外，廣府人研究雷電亦有科學一面，例如以雷電預測天氣，有首農諺：

東攝雨淙淙，西攝曬蝦公。

南攝攝三夜，北攝雨就射。

意思甚明顯，係從攝爧（閃電）之方位預測未來天氣：東方攝將會雨落連綿，西方攝將會日光照遍，南方攝就會數日不止，北方攝就恐怕會冧天。

適逢雨季，不妨留意有否如此規律，睇吓先輩智慧係咪果眞咁靈擎。

[恆智德]

@sudo 喺 電母舊底稱「攝爧」 雷公自古得人驚 入面講：

「行」 字陽平聲，發音時間長，低沉有力，感覺如行雷時「轟隆隆」之狀；而官話「打」字，發音上揚，頭重腳輕，飄忽無力，無論形象或氣勢均稍遜一籌。

北佬好似幾鍾意「打」？
打水打飯打醬油、打車、打電話、打雷、打哪來，仲會打乜？

[恆智德]

@sudo 喺 電母舊底稱「攝爧」 雷公自古得人驚 入面講：

「風舊」

睇咗一排先醒起作者想講「風䊆」，即係一大䊆風
開始仲以爲係舊年嘅風

䊆：巨九切，音臼，舂糗也，即係舂爛嘅熟米飯，一大團，一大䊆。
呢個字讀音吻合，意思貼切，連個字都提示埋意思：臼用來舂米，再加埋米，就係一「䊆」；之後就引申到一大團無定形物

不過而家都無人講「風䊆」，個個都講「風球」；睇字面義真係以爲颱風都係圓形

[恆智德]

@sudo 喺 電母舊底稱「攝爧」 雷公自古得人驚 入面講：

北攝雨就射。
北方攝就恐怕會冧天。

原作者係咪寫錯字？雨就瀉？倒瀉水噉？

[恆智德]

@sudo 喺 電母舊底稱「攝爧」 雷公自古得人驚 入面講：

「攝」走人三魂七魄

攝青鬼究竟攝乜「青」？好似舞獅噉采青？
又或者「青」其實係「精」，指人嘅氣血精華？

[恆智德]

@sudo 喺 電母舊底稱「攝爧」 雷公自古得人驚 入面講：

廣府人研究雷電亦有科學一面，例如以雷電預測天氣，有首農諺：
東攝雨淙淙，西攝曬蝦公。
南攝攝三夜，北攝雨就射。

有詩爲證就叫科學？
風水佬都可以叫科學家

[恆智德]

@sudo 喺 電母舊底稱「攝爧」 雷公自古得人驚 入面講：

「爧」字《廣韻》解做「火光貎」

火光貌