擇偶最忌劏猪凳？ 命理玩笑豈當真

[sudo]

http://www.cantonese.asia/portal.php?mod=view&aid=786

2015-5-2 17:15| 發佈者: highyun| 原作者: 謝主隆

摘要: 古代中國，男尊女卑，婦女命運受人安排，冇得自由戀愛不特止，仲要受「三從四德」約束，「在家從父，出嫁從夫，夫死從子」。一個唔好彩，若果個女仔出嫁後，夫君不幸身亡，咁就慘咯，三姑六婆閒言閒語有牌受，最大殺 ...

古代中國，男尊女卑，婦女命運受人安排，冇得自由戀愛不特止，仲要受「三從四德」約束，「在家從父，出嫁從夫，夫死從子」。一個唔好彩，若果個女仔出嫁後，夫君不幸身亡，咁就慘咯，三姑六婆閒言閒語有牌受，最大殺傷力莫過於村口八姑呢句：「佢啊，正一劏豬凳嚟㗎！」。

所謂「劏豬凳」，就係剋夫。舊時豬肉佬包辦養猪、劏豬、賣肉。有張凳係劏豬時專用，行內稱爲「劏豬凳」。生歐歐嘅肥猪，一旦俾人擡上張凳，就死期到矣。於是乎，想像力豐富者將命硬女人比作「劏豬凳」，而同佢結婚嘅男人就係隻豬，當個男人同女人行埋，就命不久矣。粵語「行埋」即「上」，一「上」就死，十足劏豬之凳，剋夫如此之女人，都咪話唔得人驚！

當然，家吓男女平等，話人「劏豬凳」又好，「剋夫命」又好，都極唔尊重女性，而且唔科學添。講起「劏豬凳」，令人諗起一齣八十年代嘅電影，叫〈小生怕怕〉。

電影裏頭，女主角鄭文雅先後同咗三個男人結婚，第一個係電影明星鄧理慶，姜大衛飾演；第二個係黑社會大佬湯德仁，王青（花名「大口青」）飾演；第三個係牧師朱錦春，黃百鳴飾演。三任老公先後意外死亡，佢哋嘅魂魄匿喺把油紙遮處，曾志偉一路帶佢哋去鬼王廟，一路不斷嗌住三人嘅姓：「湯朱鄧」、「湯朱鄧」，俾個啱啱喪夫嘅老婦聽到，以爲話緊佢「劏豬凳」，於是乎畀人𢱕一身在所難免……橋雖然老餅，但硬係覺得好笑過而家啲電影，而且隻歌夠晒經典，一聽就諗起湯、朱、鄧三隻開心鬼。

[恆智德]

加tag #劏

[恆智德]

@sudo 喺 擇偶最忌劏猪凳？ 命理玩笑豈當真 入面講：

第一個係電影明星鄧理慶，姜大衛飾演；第二個係黑社會大佬湯德仁，王青（花名「大口青」）飾演；第三個係牧師朱錦春，黃百鳴飾演。

三條友都食字
鄧理慶 - 戥你㷫
湯德仁 - 劏得人
朱錦春 - 明嘅自然明