粵語何止得六調 高平高降有玄妙

[sudo]

http://www.cantonese.asia/portal.php?mod=view&aid=817

2015-10-30 18:59| 發佈者: highyun| 原作者: 謝主隆

摘要: 「私人」、「詩人」，「好酸」、「好孫」，「荒唐」、「方糖」查實讀音有別。

時時聽聞話粵語（省城話）有六調九聲，即係六個調值加上三個入聲：「芬、粉、瞓、墳、憤、份、忽、法、佛」。查實，此說未夠準確，第一聲陰平，原本有兩個調值，一曰「高平」，一個叫「高降」。

「方糖」同「荒唐」，「好孫」同「好酸」，兩組中，前一個係高平，後一個係高降。「[me1]嘢」，若然[me1]讀高平，係「背住啲嘢」嘅「孭嘢」，讀高降則係「甚麽東西」嘅「咩嘢」，爭好遠。至於「邊邊」，係多義詞，第二個「邊」視乎聲調變化，有唔同意思。若然想問「哪一邊」，就係「邊邊53」，若然講緊物件嘅邊緣，就係「邊邊55」。

高平同高降若合而為一，分分鐘有辨義障礙。例如，你聽到有人講：「我好憎結婚」，你唔知佢究竟係好唔想「結婚53」抑或好憎一個叫「潔芬55」嘅女仔。又若然有人問你一個「私人問題」，你會猶疑佢究竟想問你私隱嘢抑或想考你有關詩人嘅知識。以下兩件外交禮物正可說明「詩人」、「私人」之別：

沙翁係詩人

呢堆老翻CD係某君私人珍藏

有齣廣播劇有如下對話：「老世，我要求加人工」「嗯，有商量……加你百分之五啦」「得百分之五？又話有雙糧嘅？」異曲同工，有報紙C1娛樂新聞，暗示女藝人胸部豐滿，就玩食字gag話佢「好雙乳」。無論「雙糧」諧音「商量」，抑或「好相與」諧音「好雙乳」，都只爲製造搞笑效果，但實情上述「雙55」同「商53」、「相」發音並唔相同，又有幾多人為意到？

根據五度標調法，高平爲「55」，高降爲「53」。曉音律者更易明白，數字5可代入音階So，數字3可代入音階Mi，高平調保持相對高音So唔變，而高降調則由So滑落至Mi。若不通音律亦冇相干，大可以借鑒國語。國語四聲中，第一聲陰平正好對應粵語高平，第四聲去聲正好對應粵語高降。例如，以國語讀「吸」、「係」，就分別係「詩」同「私」嘅粵語讀音；至於想知道「邊邊」嘅兩種讀法，只需要試吓用國語讀「賓賓」同「賓鬢」就分得清清楚楚。

此外，「唔該」亦有兩層意思。「唔該53」即Thank you」，向對方致謝，如「今次真係唔該晒你」；而「唔該55」則爲「Execuse me!」，用於引起對方注意，如「唔該！請問厠所喺邊？」細微分別中，可見粵語之精緻。

[親衛隊]

有冇片？點分55、53？雙、商唔係同音咩

[港產片語料]

好難分得清，55、53個主調都係5，3一下就帶過

[港產片語料]

@sudo 喺 粵語何止得六調 高平高降有玄妙 入面講：

想知道「邊邊」嘅兩種讀法，只需要試吓用國語讀「賓賓」同「賓鬢」

北方話「鬢」係51，調值明顯下降，同53仲係爭啲

[港產片語料]

@sudo 喺 粵語何止得六調 高平高降有玄妙 入面講：

國語四聲中，第一聲陰平正好對應粵語高平，第四聲去聲正好對應粵語高降

北京話第四聲係51，廣州話係53，唔match得嗮
https://zh.wikipedia.org/zh-tw/四聲

[恆智德]

@港產片語料 可以試下連讀 「西世」感受下