嚟自有關食物嘅貶義詞

[sudo]

https://cantonesemuseum.blogspot.com/2018/10/blog-post_31.html

嚟自有關食物嘅貶義詞

嚟自有關食物嘅貶義詞

用食物嚟形容人，廣東話始終係高一班！

美式英文，鍾意叫嗰啲法國浪子做［嗰條法國麵包］，而喺英文嘅世界入面，形容女人會叫佢哋做［蜜桃 honey peach］，而情人就會叫佢哋做［蜜糖 honey］，［牛奶 milk］、［葡萄 vesicular］或者［朱古力 Chocolate］。

啲西方人用食物嚟比喻人，總係比喻啲好嘅同靚嘅嘢。但係，喺廣東話嘅世界入面就唔一樣嘞，廣東人用食物嚟比喻人嘅，一般都唔方係好嘢。

＊＊

。雞　　　　係指［妓女］，而召奴又稱做［叫雞］
。雞蟲　　　係指好色嘅男人，又叫［雞精］
。北菇雞　　係指北方嚟嘅［妓女］
。馬拉雞　　係比喻啲瘦到似條柴嘅女人
。黄腳雞　　其實係指雞公，［捉黄腳雞］即係話畀人［捉姦在床］
。菠蘿雞　　係指解嗰專佔人便宜搵著數嘅無賴
。執死雞　　係形容好幸運得到人哋放棄或失誤留低嘅嘢

。鴨　　　　係指［男妓］，係［雞］嘅引申詞
。賣鴨　　　係形容人講嘢乜都話得［duck］，重有一個叫［duck 哥］添
。竹織鴨　　係形容啲冇良心，冇心肝嘅人
。掛臘鴨　　就係指嗰啲吊頸死嘅人
。鹹鴨蛋　　係指死咗［完蛋］嘅人
。賣鹹鴨蛋　意思係話死咗落下面做生意嘅人［死落去做生意］

。豬　　　　係形容肥同蠢嘅人，肥人叫肥豬，蠢人就叫...
。豬扒　　　係啲口衰嘅男用嚟形容貌醜嘅女人，有時靚嘅都一樣咁叫
。豬頭　　　係譏諷嗰啲又醜又蠢嘅人
。豬兜　　　都係形容嗰啲又肥又蠢嘅人
。豬公　　　係形容鹹濕嘅男人，多數叫佢哋做［鹹濕仔／鹹濕佬］　
。豬乸　　　有人以為係形容啲女人好生養，其實係指好色嘅女人
。豬腩肉　　係形容嗰啲肥人嘅肚腩肉
。砌生猪肉　即係指以前啲差人做假證據屈人
。排骨　　　形容瘦到得棚骨嘅人，重有個叫［排骨精］
。火腿　　　係形容人嘅大腿粗壯，出名嘅係叫［金華火腿］
。粉腸　　　唔係好嘢［量詞係：條］

。牛　　　　通常係指做事唔識變通嘅人［成隻牛咁］
。牛頸　　　係指人唔識變通，又唔聽人勸［死牛一面頸］
。吹牛　　　形容冇實力，只係得個講嘅人
。劏死牛　　即係指有人打劫／搶劫

。羊　　　　形容好易被呃嘅人；有個任人宰割嘅人叫［羊牯］
。掛羊頭　　有句嘢叫做［掛羊頭賣狗肉］；
　　　　　　係比喻用好嘅名義嚟做招牌，實際上名不副實或者做壞事

。狗　　　　好諷刺嘅動物，佢嘅忠誠亦畀人利用嚟侮辱人嘅對象
。狗肉　　　廣東俗語有一句：［狗肉滾兩滾，神仙都企唔穩］
。熠熟狗頭　喻指人笑得呲牙咧嘴

。貓
。食貓麵　　比喻啲人捱鬧，丟架、難堪
。食死貓　　形容有人含冤受屈，無從申辯，被迫為人頂罪

。蛇王　　　即係話人偷懶

。龜
。龜蛋　　　唔只好食，重可以用嚟鬧人
。烏龜　　　多數用嚟指速度慢，受驚就縮入龜殼，似好冇出息咁
。縮頭烏龜　形容細膽、冇擔當力嘅男人
。龜公　　　係靠妓女維生嘅男人［王八］
。龜婆　　　指靠妓女維生嘅女人［鴇母］
。水魚　　　通常係指好容易畀人呃嘅人［量詞係：條］

。魚
。魚腩　　　形容好易應付嘅人，又指打牌周時輸錢嘅人
。鹹魚　　　形容嗰啲死咗嘅人，即係［死屍］
。死魚　　　死咗嘅魚；形容性伴對戰時冇反應
。死魚眼　　形容雙眼無神情嘅人
。失魂魚　　形容人驚慌魯莽，好易似受驚嚇親
。擳魚蛋　　係指一啲唔正經嘅活動，重有［魚蛋檔，魚蛋妹，魚蛋師傅］

。大頭蝦　　形容嗰啲粗心大意，粗枝大葉嘅人
。攋尿蝦　　取笑夜晚瀨尿喺床度嘅細路仔
。大閘蟹　　係指投資股票，價位低被綁唔能夠出貨
。老虎蟹　　比喻橫行霸道嘅大惡人
。炒魷魚　　係指有人被解雇

。鵪鶉　　　形容生性極度細膽嘅人；係指膽小怕事嘅人
。鴕鳥　　　畀人形容為懦弱而唔敢面對現實，只求得心理上安全感嘅動物
。了哥　　　有句歇後語叫［黄皮樹了哥，唔熟唔食］；專搵熟人笨實
。劏白鶴　　形容飲醉酒醉到嘔嘅人
。撳鷓鴣　　形容畀人搵笨［佢畀人撳鷓鴣］
。天鵝肉　　癩蛤蟆想食天鵝肉，比喻冇自知之明，一心想得到唔可能到手嘅嘢

。蛋　　　　好多人都唔鍾意嘅，就係［完蛋］
。荷包蛋　　形容女人個胸細

。一舊飯　　多數係指人［蠢／遲鈍］
。食軟飯　　專靠女人供養嘅男人
。一鑊粥　　比喻做事結果一塌糊塗　
。冇米粥　　比喻做埋啲冇結果嘅事，又叫［煲無米粥］
。電話粥　　意思係指人長時間講電話傾偈，又叫做［煲電話粥］
。裹蒸粽　　形容人著衫著到好臃腫
。蒸鬆糕　　上面蒸鬆糕，係話人上半身著得好密實
。食塞米　　即係話嗰啲成日遊手好閒，冇啲建樹嘅人

。涼粉　　　下面賣涼粉，係話人下半身著得好少布
。蛋散　　　係形容不學無術，冇料到，無用嘅人
。煎堆　　　娶老婆［年晚煎堆］，但求人有我有
。老油條　　而家係形容好滑頭嘅人，以前係指軟腍腍［無厘火氣］嘅人
。生煎包　　係形容女人個胸細
。發水麵包　形容人塊面肥或者腫
。女人湯圓　特别討女人歡心嘅男人／專氹女人搵食嘅男人
。冬瓜豆腐　代表出咗意外或者有不測嘅含義

。老藕　　　係形容［老女人／老處女］
。煲老藕　　係形容男人愛上年紀比自己大嘅女人
。抛生藕　　係指女人發姣放生電

。豆泥　　　形容品質次等，水平低嘅嘢
。豆豉眼　　係指啲人眼睛細細［豆豉咁眼］

。薯仔　　　形容人愚蠢，無知；或者外表感覺呆頭呆腦嘅人
。大冬瓜　　係形容啲人又矮又肥
。大番薯　　都係指人嘅身形又矮又肥
。大頭菜　　形容寵壞咗嘅細路仔［生骨大頭菜］
。蘿蔔腿　　係形容啲人嘅小腿又肥又火粗

。放葫蘆　　形容人吹牛皮［講大話］
。秀珍菇　　形容啲纖瘦嘅女人
。炖冬菇　　係指有人被降職

。金菇菜　　形容啲富家女［有錢女］
。梅菜　　　形容啲出身家窮嘅女人
。菠菜　　　形容身材超勁嘅女人
。雪菜　　　形容啲冷若冰霜嘅女人［cool］
。甕菜　　　形容啲傻更更嘅女人［憨菜］
。白菜　　　形容乜都唔識嘅女人
。油麥菜　　形容濃妝艷抹嘅女人
。豬乸菜　　形容肥胖嘅女人
。玻璃生菜　形容好深近視嘅後生女人［四眼妹］
。十月芥菜　形容嗰啲開始春心動嘅少女

。運桔　　　指嗰啲打斷或影響人正常工作嘅無聊行為，又叫［混吉］
。皇帝蕉　　形容啲手指又肥又短／又粗又短
。刨西瓜　　形容哨牙嘅人食西瓜，而哨牙嘅人就叫［西瓜刨］
。西瓜皮　　話人唔夠專業［正一西瓜皮］，意思［都唔係果（嗰）皮］
。賣剩蔗　　形容年過三十嘅單身中女
。籮底橙　　形容重未嫁得出嘅剩女

你睇我哋將自己同啲食物醜化到咩程度？食物其實係啲好嚟嘅，應該用嚟比喻啲好嘅事，比喻啲靚嘅嘢，比喻情人身上嘅特點同優點之類。點解啲西人可以咁講，而廣東人就唔可以呢？會唔會係廣東人都覺得啲食物唔夠優雅呢？

咁又係嘅，你總唔能夠去形容一個［廣東男人］，叫佢做「嗰條廣東臘腸」，都幾難聽，都重係［嗰條法國麵包］比較含蓄啲。

＊＊

香港記憶［清潔效野1990］廣告

你與我永遠一心 要郊野添潔淨

［大家心意相通　齊齊投入清潔運動］

心心一致　投入共推動

青蔥郊野　更清潔清爽

施展好本領　投人盡分力

即刻參與　更投入清潔郊區

一心一意

＊＊

廣東話資料館

[親衛隊]

狗 = popo

[粵語片語料]

@sudo 喺 嚟自有關食物嘅貶義詞 入面講：

西瓜皮　　話人唔夠專業［正一西瓜皮］，意思［都唔係果（嗰）皮］

應該係話「跣死人」？

[粵語片語料]

@sudo 雞鴨一定係食物？貓狗又係食物？鴕鳥、了哥、白鶴、鷓鴣都有人食？

你睇我哋將自己同啲食物醜化到咩程度？食物其實係啲好嚟嘅，應該用嚟比喻啲好嘅事，比喻啲靚嘅嘢，比喻情人身上嘅特點同優點之類

作者唔過年？過年唔食意頭菜？比如年年有魚、發財豬手、煎堆一逯金銀滿屋、步步糕升等等

就算唔計上邊呢堆，蓮子蓉面口、糖黐豆、新鮮蘿蔔皮呢啲唔係靚嘢？

[粵語片語料]

@sudo 喺 嚟自有關食物嘅貶義詞 入面講：

老虎蟹　　比喻橫行霸道嘅大惡人

淨係聽過用作助詞，如「呢次老虎蟹都要搏命！」
老虎蟹，明嘅自然明

[粵語片語料]

@sudo 喺 嚟自有關食物嘅貶義詞 入面講：

指軟腍腍［無厘火氣］嘅人

似係「隔夜油炸鬼」

[粵語片語料]

@sudo 喺 嚟自有關食物嘅貶義詞 入面講：

豬頭　　　係譏諷嗰啲又醜又蠢嘅人

未必係貶義，比如俗語「發到豬頭噉」

[薯皮]

@粵語片語料 仲有開心果

[粵語片語料]

@薯皮 早晨啊薯皮
廣東話叫堅果做開心果，英文入面 nuts就等如癲佬
查實每種語言肯定都會用食物作比喻，有好有壞，有辣有唔辣，淨係針住貶義詞未免偏頗

[恆智德]

@粵語片語料 喺 嚟自有關食物嘅貶義詞 入面講：

應該係話「跣死人」

畀西瓜皮你踩：使人跌倒，比喻整治人靠害
https://apps.itsc.cuhk.edu.hk/hanyu/Page/Search.aspx?id=2190

跣西瓜皮：暗中設置困難害人
http://apps.itsc.cuhk.edu.hk/hanyu/Page/Search.aspx?id=11888

[薯皮]

@粵語片語料 早晨