http://www.cantonese.asia/portal.php?mod=view&aid=823
2016-4-17 19:00| 發佈者: highyun| 原作者: 謝主隆
摘要: 「無厘頭」查實有來頭，本文細說因由。
自上世紀九十年代周星馳冒起，「無厘頭」同「星爺」已畫上等號。若問「無厘頭」係乜嘢意思，相信好多人會答：「咪即係好好笑咁解囉！」查實，「星系」電影對白經已解釋咗呢個詞。
〈大內密探零零發〉佛印羅家英：「好難捉摸啊！」
〈食神〉唐牛谷德昭：「我眞係估你唔到！」
雖則周星馳算係「無厘頭文化」嘅標誌，但「無厘頭」一詞早於星爺出世前就有。由字面睇，有人認爲係「無嚟頭緒」嘅簡寫，更多人認爲「無厘頭」即「無嚟頭」，既「無來頭」，自然令人難以觸摸，不知來龍去脉。
以上解釋都啱咗部份，的確係「嚟」，亦的確係四字詞之簡寫，但唔係「無嚟頭緒」，而係「無嚟頭尻」。切勿誤會，「尻」並非生於人體前方嘅器官「鳩」或「㞗」，而係脊骨尾部，即尾龍骨（尾龍骨又稱「尾尻骨」）。
澤尻繪里香
此外，「無嚟（冇嚟）……」呢種句式，廣東話甚為常見，如「冇嚟神氣」、「冇嚟癮」、「冇嚟醒目」……。於是「無嚟頭尻」，就係形容人或事分唔清次序頭尾，毫無邏輯，既「難捉摸」亦「估唔到」。至於四個字縮爲三個字，皆因「尻」無論讀音字形都太似粗口，令人避忌而不敢讀出，故此畧去。事實上，「尻」讀[haau1敲]音，但大部份人認定「尻」就係粗口，仲幫「無嚟頭尻」搵咗個兄弟「無嚟頭柒」，實情係「尻唔搭柒」，錯到加零一。至此，算係交代清楚「無嚟頭」之來頭。
「你話我果然無厘頭，我夠話你瞓醒戇狗狗咯」
可能星爺亦以爲「尻」係粗口，可與「戇」搭配
因避諱而畧去部份字詞嘅畸士（Case），非獨「無厘頭」一個。譬如「捉蟲」，乃「捉蟲入屎窟」之簡寫，皆因「屎窟」算係不雅之詞，故此隱去，但「捉蟲」兩字卻不足以令人聯想到「自找麻煩」之意思。仲有，時興閙人「你食啦！」，乃隱去「蕉」或「屎」，從而避免不雅，亦可减少傷害程度。
其實「無釐……」就係「冇啲……」嘅意思，寫成「無嚟」反而多咗重工。
@sudo 喺 何謂「無厘頭」 畧字有因由 入面講：
「無嚟（冇嚟）……」呢種句式，廣東話甚為常見，如「冇嚟神氣」、「冇嚟癮」、「冇嚟醒目」……。於是「無嚟頭尻」
無尻你都要駁條尻？真係「鳩尾續貂」
「無來（lei4）頭」已經合情合理
呢排返煲《上海灘》，發覺入邊好多人都將「來」讀lei4
@恆智德 喺 何謂「無厘頭」 畧字有因由 入面講：
《上海灘》，發覺入邊好多人都將「來」讀lei4
第一集 16：21 李老闆叫人「入來(lei4)」
22：29 發哥：王老闆，你應該知道我今日來(lei4)
https://gimy.co/eps/50980-2-1.html
