四四六六拆唔掂 反轉豬肚實開片

[sudo]

http://www.cantonese.asia/portal.php?mod=view&aid=791

2015-6-4 11:44| 發佈者: highyun| 原作者: 謝主隆

摘要: 「四四六六」原係黑幫術語，形容一夥人做事時，要「整整齊齊、分配適當地處理事情」。有人認爲江湖中人分贓講數時開口就「你四我六」、「你六我四」，故此就有「四四六六」之講法。查實此詞另有來源。 ...

設計對白）甲：老友，你撞壞咗我盞車頭燈喎，點賠法？乙：老友，你整傷咗我隻手指尾喎，我啲醫藥費又點計？甲：不如咁喇，我哋唔好阻住條街，行埋路邊先四四六六傾掂佢。

「四四六六」原係黑幫術語，形容一夥人做事時，要「整整齊齊、分配適當地處理事情」。有人認爲江湖中人分贓講數時開口就「你四我六」、「你六我四」，故此就有「四四六六」之講法。查實此詞來源有二：

一說可從《都城紀勝》得知，指南宋時代講究吃喝，官府或富貴人家之廚房均置有「四司六局」，好使「筵席排當，凡事整齊」。所謂四司，係帳設司、茶酒司、廚司、台盤司，六局係果子局、蜜煎局、菜蔬局、油燭局、香藥局、排辦局。「四司六局」嘅人辦事有條理，考慮周到，配合默契。傳入粵語就因發音相近訛作「四四六六」，形容談判時雙方清清楚楚，處理得當。

另一說則指六朝唐初所盛行嘅散文文體「駢文」，其句式多為四六句及對仗，故又稱四六文、駢儷或駢體。如南北朝吳均〈與宋元思書〉：「泉水激石，泠泠作響；好鳥相鳴，嚶嚶成韻。蟬則千囀不窮，猿則百叫無絕」。「四六駢文」講求「對偶工整，聲律和諧，詞藻華麗」，故此引申出「四四六六」之意思。

初唐王勃〈滕王閣序〉
「四四六六」後常接「拆掂佢」，所謂「拆」，即「拆數分賬」咁解。港産黑幫片常見以下對白：「呢籠蝦餃係我嘅」「呢個扠包點都應該我食喇啩」「咁嗰碟燒賣又點分先？」「你係咪當我隻鳳爪冇料到？」……

若然講唔掂數，則必然反檯、開片，四四六六拆唔掂，反轉豬肚，分分鐘流血收場。

[恆智德]

@sudo 喺 四四六六拆唔掂 反轉豬肚實開片 入面講：

港産黑幫片常見以下對白：「呢籠蝦餃係我嘅」「呢個扠包點都應該我食喇啩」「咁嗰碟燒賣又點分先？」「你係咪當我隻鳳爪冇料到？」

估下邊齣戲對白？

[港產片語料]

@恆智德 《新精武門》兩大佬酒樓講數 （1:06開始）
https://www.youtube.com/watch?v=TEY2OIv-eHk