點睇中国為提升民族意識，大力推動「文化遺產」？

[Rehk]

包括但不限於各種古老工藝、技藝、服飾文化。

為大家提供兩個方向：

好：
可以保留文化遺產，傳承傳統文化

壞：
所謂「文化遺產」只係被時代淘汰嘅嘢，返古行為不可取，旨在營造虛假嘅「民族意識」

[恆智德]

你發起討論都應該舉幾個例子啊嘛？
大力推動係點樣大力法呢？

[Rehk]

@恆智德 即係唔同媒體入面都好鼓勵同推動呢啲「文化遺產」內容，政府層面可能就係有啲乜乜「文化節」「文化遺產傳承人」同少少津貼

[Rehk]

冇人答，咁我自問自答一下。

我覺得有唔少「文化遺產」係有得搞，但係好多時候都搞得好差，令到件事好失敗。

中国唔少「文化遺產」從業者嘅形象係「好辛苦，賺唔到錢，但為咗繼承祖先流傳落嚟嘅，辛苦啲都要」。

其實從業者堅持「古法」冇問題，但之後嘅「價值變現」都跟舊時唔改就一定聽乞米，其實好多都可以轉型做文創產業，令個「文化遺產」有錢賺，先會可持續長遠發展。

舉一個實際例子係「古法造紙」，好辛苦由零開始整幅紙出嚟，之後一大幅賣比啲書法家畫家之類，費時費力又賣唔到高價。但其實可以轉做文創，最簡單就係將一大幅紙裁剪做細張當明信片/信紙賣；長遠應該再做成其他精品產品，例如紙膠帶、紙燈罩，提升個客路同毛利，例如日本都有類似嘅「古法造紙」文創做得好成功。

[BBQ]

中國文革後已經無乜『文化遺產』。。。
例如：文革時曲阜剷平咗孔子墓，近年又堆返啲小山丘出唻變返景點。
今天啲所謂『文化遺產』，有好多都被經過刪改。
我自己覺得『推動文化遺產』本來就係一個偽名題。

[Rehk]

@BBQ 雖然你提出嘅都好有討論價值，但我呢個話題講嘅「文化遺產」唔係建築之類真係有舊野果種「遺產嘢」，係講工藝之類果種「文化嘢」

[BBQ]

@Rekh 工藝類。。。我成日都上淘寶搵下有咩工藝類『文化遺產』，之但係真係無乜好野。。。

絲啊，香雲紗啊，苗銀啊，紫砂啊，端硯啊，蘇杭刺綉啊，翡翠啊哩啲我全部都有興趣（翡翠有交過唔少學費）。只可以講大多數都商業味濃，搵錢致上，離營造『民族意識』好遠。

如果你係講漢服文化嘅，我覺得大多數人純粹覺得靚，打咭為主。

[Rehk]

@BBQ 點講好呢，刺繡相聲之類廣為人知嘅的確一直都有，但中国近年推動啲少人知嘅工藝技藝，大概係想「提升民族自信」「中國文化好偉大」去培養啲人「以國家民族為榮」，作為一種與「硬性宣傳」例如黨八股對應嘅「軟性宣傳」，「漢服」近年興起絕對同呢種政策有關

[Rehk]

@BBQ 講開又講，淘寶有啲幾得意嘅「文化遺產」diy體驗包，你唔杯葛淘寶嘅話可以買嚟玩吓，如果我唔係堅持唔會再幫襯淘寶應該都會想玩吓

[恆智德]

如果用淘寶舉例，咁就講唔清所謂 大力推廣文化遺產 係政府行爲定商業行爲

[Rehk]

@恆智德 淘寶唔係重點，都話講開又講 主要係各大媒體，至於媒體係商業定政治行為就見仁見智