「同行」有本土話法 老友情侶最合「拍」

[sudo]

http://www.cantonese.asia/portal.php?mod=view&aid=834

2017-2-24 15:25| 發佈者: highyun| 原作者: 謝主隆

摘要: 香港最高民望嘅行政長官參選人，以「拍住上」爲宣傳語，表明與港人「拍住上」。而另一熱門參選人，則以「同行」爲主題。「同行」與「拍住上」意思相近，但其中一個更有親和力，皆因「同聲同氣」。 ...

香港最高民望嘅行政長官參選人，以「拍住上」爲宣傳語，表明與港人「拍住上」。而另一熱門參選人，則以「同行」爲主題。「同行」與「拍住上」意思相近，但其中一個更有親和力，皆因「同聲同氣」。

「拍住上」即大家同心協力，相互扶持，一齊迎難而上。廣東話裏頭，「拍」未必係手部動作，可以描述兩人或多人之並行或距離緊密狀態，如「一拍行」即兩人肩並肩行，「一拍坐」即兩人坐埋一齊；若然話徒弟技藝不遜於師父，則可講佢「拍得住師父」（追到幾乎並排）；佮份做生意嘅，可算係「拍拿」（partner），即「拍檔」；若希望各人相互配合做好某件差事，則會請求各人「拍硬檔」。

至於使用頻率最高者，非「拍拖」莫屬。

或以爲，情侶「拖」下手仔，影下相（拍照），故曰「拍拖」，實質係同「花尾艔」有關。花尾艔係上世紀廣東水路客運全盛時期嘅內河運輸工具，船體碩大，裝修華麗，貌似畫舫。其最大特色係不設動力機艙，全靠前頭嘅火輪拖住，所以船內即無噪音，亦唔震動，深受旅客歡迎。

但由於花尾艔動力靠火輪船提供，兩船之間拖纜長達數丈，當進入內河港口時，河面複雜，船艇眾多，以火輪拖行嘅方式難以操作。因此，火輪會慢慢收纜，改爲拍埋大船旁邊，靠動力既𢶜（推）又拖，令大船埋埠。此時，兩船緊密相偎，一大一細，狀如一對戀人，「拍拖」一詞便由此而生。

附帶提下，根據白宛如《廣州方言詞典》，「拍」寫做「走白」，信不信由你。

[sudo]

因爲粵語協會網站年久失修，網站證書提示安全風險，廣告無人清理。

我準備逐步搬運粵協文章，希望更多人可以睇到。

[sudo]

@GMod 同類轉載文章請幫手轉文化台

[港產片語料]

@sudo 喺 「同行」有本土話法 老友情侶最合「拍」 入面講：

香港最高民望嘅行政長官參選人，以「拍住上」爲宣傳語，表明與港人「拍住上」。而另一熱門參選人，則以「同行」爲主題。「同行」與「拍住上」意思相近，但其中一個更有親和力，皆因「同聲同氣」。

民望高就要拉你落來
而家乾脆唔畀你揀，好快就會「協商產生」