粵民時報：走馬觀花：穿鑿附會之最，莫過於以《諸蕃志》同《送鄭尚書序》「證明」南海主權

[sudo]

https://yatbou.blogspot.com/2016/07/blog-post.html

走馬觀花：穿鑿附會之最，莫過於以《諸蕃志》同《送鄭尚書序》「證明」南海主權

張貼時間：25th July 2016，張貼者：粵民時報 Cantonese Express

南沙群島之中嘅太平島衛星圖片

雖則南海問題自從七十年代開始一路都存在，但係仲裁案一宣判，南海問題似乎又變到更加複雜，而中國方面，因為成日自稱有五千年文明，就自不然會搵下啲歷史證據去支持自己一貫嘅「自古以來論」。就好似以下呢個係中國外交部嘅網頁，入面有記載所謂歷史「證據」：
http://www.mfa.gov.cn/chn//pds/ziliao/tytj/t10648.htm

但搵還搵，就唔好吹咁大，有時睇到呢啲所謂歷史「證據」，又真係得啖笑。

首先，入面提到東漢楊孚《異物誌》有「漲海崎頭，水淺而多磁石」嘅記載。無錯，呢度講嘅「漲海」係當時東漢對南海嘅稱呼，而「崎頭」就係當時對包括今日西沙南沙在內嘅南海諸島入面島、礁、沙、灘嘅形容。似乎個「證據」好確鑿播。

咪住！「漲海崎頭，水淺而多磁石」呢句野根本就係地理描述，並唔代表呢啲「崎頭」屬於東漢管理，《異物誌》入面仲形容咗好多地方播，而且中外都有，例如今日嘅泰國，咁呢啲又係咪代表泰國自古以嚟係中國領土？

仲有！東漢楊孚《異物志》呢一部分嘅全文係「漲海崎頭，水淺而多磁石，徼外大舟，錮以鐵葉，值之多拔。」意思係南海礁沙水淺，多產磁鐵，外國大船有部分係用鐵片加固嘅，到咗呢個地方就被磁鐵吸住唔郁得，咁係咪即係話，當時外國人都已經嚟到西沙南沙等地？咁你中國又肯唔肯定你係第一個發現呢啲島礁嘅呢？

另一個牽強「證據」，係聲稱唐穆宗時明令嶺南節度使管轄的範圍包括南海諸島。搵嚟搵去，提到嘅文獻，原來係大文豪韓愈寫嘅《送鄭尚書序》，我地又睇下佢寫咗乜：

嶺之南，其州七十，其二十二隸嶺南節度府，其四十餘分四府，府各置帥，然獨嶺南節度為大府。大府始至，四府必使其佐啟問起居，謝守地不得即賀以為禮。歲時必遣賀問，致水土物。大府帥或道過其府，府帥必戎服，左握刀，右屬弓矢，帕首袴鞾迎郊。及既至，大府帥先入據館，帥守屏，若將趨入拜庭之為者；大府與之為讓至一再，乃敢改服，以賓主見；適位執爵皆興拜，不許乃止，虔若小侯之事大國。有大事，諮而後行。隸府之州，離府遠者至三千里，懸隔山海，使必數月而後能至。蠻夷悍輕，易怨以變，其南州皆岸大海，多洲島，颿風一日踔數千里，漫瀾不見蹤跡。控禦失所，依險阻，結黨仇，機毒矢以待將吏，撞搪呼號以相和應，蜂屯蟻雜，不可爬梳，好則人，怒則獸。故常薄其征入，簡節而疏目，時有所遺漏，不究切之，長養以兒子；至紛不可治，乃草而禽獮之，盡根株痛斷乃止。其海外雜國，若耽浮羅、流求、毛人、夷亶之州，林邑、扶南、真臘、於陀利之屬，東南際天地以萬數，或時候風潮朝貢，蠻胡賈人舶交海中。若嶺南帥得其人，則一邊盡治，不相寇盜賊殺，無風魚之災，水旱癘毒之患，外國之貨日至，珠香象犀玳瑁奇物溢於中國，不可勝用。故選帥常重於他鎮，非有文武威風、知大體、可畏信者，則不幸往往有事。

最相關嘅部分，都非「隸府之州，離府遠者至三千里，懸隔山海，使必數月而後能至。蠻夷悍輕，易怨以變，其南州皆岸大海，多洲島，颿風一日踔數千里，漫瀾不見蹤跡。」莫屬，之但係「其南州皆岸大海，多洲島，颿風一日踔數千里，漫瀾不見蹤跡。」呢度又係穿鑿附會，人地係形容，係指出當地嘅路程遙遠，但佢無講過任何「屬嶺南節度管」之類嘅野播，咁呢啲又算咩證據？

再一個「證據」係「宋代趙汝適所著《諸蕃志》記載,唐貞元二年(公元789年),當時被稱為「千里長沙」、「萬里石塘」的南海諸島即隸屬於海南四州軍。」我地又睇下原文：

海南，漢朱崖、儋耳也。武帝平南粤，遣使自徐聞今雷州徐文縣。渡海略地，置朱崖、儋耳二郡。昭帝省儋耳併為朱崖郡。元帝從賈捐之議，罷朱崖。至梁、隋復置。唐貞觀元年，析為崖、儋、振三州，隸嶺南道。五年分崖之瓊山置郡，陞萬安縣為州，今萬安軍是也，儋、振則今之吉陽、昌化軍是也。貞元五年以瓊為督府，今因之。徐聞有遞角塲，與瓊對峙，相去約三百六十餘里，順風半日可濟，中流號三合溜，涉此無風濤，則舟人舉手相賀。至吉陽，迺海之極，亡復陸塗。外有洲曰烏里、曰蘇密、曰吉浪，南對占城，西望眞臘，東則千里長沙、萬里石床，渺茫無際，天水一色，舟舶來往，惟以指南針為則，晝夜守視唯謹，毫釐之差，生死繫焉。四郡凡十一縣，悉隸廣西西路，環拱黎母山，黎獠蟠踞其中，有生黎、熟黎之別。

呢度邊一忽有提話「千里長沙」、「萬里石塘」隸屬於海南四州軍？

我唔會否定明清以嚟嘅歷史記載，但係如果為證據而證據，夾硬將一啲野穿鑿附會，就真係笑大人個口啦！