迴響——粵語文學期刊

[恆智德]

FB主頁: https://www.facebook.com/ResonateCantonese/
官網：https://resonate.hk/

[恆智德]

【網上預售】http://kck.st/2MohkgP

我哋為廣東話再行前咗一大步，大家可唔可以同我哋一齊行

長話短說。我哋準備出一本全廣東話嘅文學期刊。
　
如果你睇咗上面二十隻字已經決定支持，多謝你。底下有預購 link。
仲係猶疑不決嘅話，睇落去。
　
～～～
　
香港係留唔住人才嘅地方。歌手、演員、作家，成名之後就唔再屬於香港。有個好鍾意嘅作家，喺網上出文，好多都用廣東話寫。幾年前嘅一日，佢出咗名，喺 Facebook 瘋傳。
之後佢嘅故仔就要出兩個版本，廣東話喺前，書面語喺後。
再過一排，佢冇再出兩個版本，所有嘢都得返書面語版。
點解？同樣用繁體字嘅台灣，人口係香港嘅三倍，睇書風氣好唔知幾多。用廣東話寫到識飛又點？結果都係要賣返去普通話、國語市場。
　
上次食飯，總編問我：「如果我哋出本文學期刊，淨係用廣東話嘅，你覺得有冇得做」
我答佢話，「香港有七百萬人，一人一蚊都掟得死你啦。」

最賣得嗰份報紙，營業額可以過億，應該有好多空間試新嘢。我唔係講大話。
如果真係有空間，點解以前冇人試？
　
件事型到爆炸，但係大家有心魔。
驚蝕錢，驚冇人睇，驚寫廣東話有好多人「睇唔明」。
　
於是香港嘅文學就十居其九都係純「書面語」，淨返一成，就加插幾句廣東俗語，就話係香港特色。
純廣東話嘅書寫——粵文，一直都係一笪無主之地。俗語話「瘦田冇人耕，耕開有人爭」，廣東話出版明明係「肥田」嚟，居然都會寸草不生。
實情只係未有人去播種。
　
若然我哋集合網上廣東話作家，一齊嘗試唔同文體，寫一堆上乘嘅小說散文出嚟，你話有冇可能改變成個 landscape 呢？有冇一日，喺香港教科書會見到呢堆高質嘅粵語文學作品呢？
香港開埠都只得幾丁友，一樣可以發展到今日嘅規模。
　
不如廣東話就等我哋嚟。
我哋做開荒牛，由我哋雙手去創造廣東話文學嘅輝煌盛世。
　
如果個市場覺得廣東話低等、冇價值，我哋會認命，然後賣樓貼錢做到廣東話贏為止。
之不過香港人個個都話熱愛廣東話，斷估唔會搞到我哋輸身家啩。
　
總之我哋準備開創歷史嘞。
可唔可以同我哋一齊行？

[親衛隊]

[Drdoom]

我老餅，冇kickstarter或patron。如有paypal我會donate。

[Rehk]

我哋之前好似都有討論過粵文創作嘅話題，係一個好嘗試

[恆智德]

@恆智德 張相居然唔見咗
原先係FB post嘅相，而家點入去 URL signature expired

[恆智德]

@恆智德 呢篇寫得幾好，做得粵文典範

有幾個位仲有得執下：

• 香港係留唔住人才嘅地方。
  香港呢笪地方留唔住人才。（傳統中文唔興用長定語）
• 幾年前嘅一日，佢出咗名，喺 Facebook 瘋傳。
  喺 Facebook 傳到癲嗮
• 之後佢嘅故仔就要出兩個版本
  古仔就古仔，古故不分
• 同樣用繁體字嘅台灣
  台灣一樣用繁體字
• 最賣得嗰份報紙，營業額可以過億，應該有好多空間試新嘢。我唔係講大話。
  「大話」一般指假話？呢度用「唔係講笑」應該更清晰
• 我哋做開荒牛，由我哋雙手去創造廣東話文學嘅輝煌盛世。
  由我哋佮手佮腳、落心落力去創造廣東話文學嘅輝煌盛世
  佮：古沓切，併佮聚。俗寫「夾」，不過「夾手夾腳」有歧義，夾親手腳咩