平行世界系列（一）：港式北歐地名

[親衞隊]

幾得意喎

---

https://vatnid.medium.com/平行世界系列-一-港式北歐地名-ed20e1dc1bf9
淵維 Vatnið

平行世界系列（一）：港式北歐地名
挪威有跑馬地，冰島有沙田圍！？

筆者除咗鍾意語言同北歐，其中一個興趣就係有時譯下啲無聊嘢，所以之前就攞咗挪威同冰島（筆者有學挪威文同冰島文，其他國家幾時整就……遲下啦）嘅一級行政區同城鎮名譯做粵文，不過譯得嚟想儘量似香港地名，噉先有返啲親切感吖嘛。

好啦，噉過程係點呢？首先好簡單，去維基打返個白鴿轉，搵返城鎮列表，放落個 excel，之後就要開始譯喇。筆者採用嘅方法係盡可能意譯，如果有啲咩專有名詞或者人名先音譯。北歐地名往往有好多重複嘅 suffix，例如 -ø/-øy 譯做「洲」， -vik 就可以譯「灣/涌/澳」（視乎邊個順口啲）；至於啲冇特別意思嘅人名，例如 Flekkefjord 就可以譯「菲力賈灣」，本身有幾乎對應嘅香港地名亦會優先採用，例如將 Sandnes 譯做「沙頭角」。

挪威地名港譯

上面有挪威嘅郡（fylke，即係一級行政區）同埋大約一百個城鎮（by），依人口排列。由上圖可見，見到有唔少重複嘅部分，主要係一啲地理特徵，例如「山、島、鄉、澳」等等，筆者傾向用啲香港特有嘅地名 suffix，例如「涌、埗、凹」，增添下香港味。至於首都奧斯陸就譯咗做「坪輋」，因爲本身 Oslo 係解「山腳嘅草原」，對應返坪輋呢個名（「輋」根據《卍齋瑣錄》卷三係解「近山之地」，係咪真係就唔知啦，不過見咁啱有個差唔多意思嘅字就攞嚟用）。

冰島地名港譯

至於冰島相對比較少人，所以無論係分區（landshluti）抑或城鎮都少啲，大概得三十個城鎮到。冰島嘅行政區劃劃分得比較模糊，除咗選區，比較常用就係統計用嘅八區分法。冰島啲地名有好多同挪威有相同嘅 suffix，例如冰島文嘅 -vík/-fjörður 對應挪威文嘅 -vik/-fjord。其他地名都係照辦煮碗，揀嘅字似返香港地名（不過冰島好多同海豹有關嘅地名，好似直接譯都 OK）。

考下大家眼力，睇下大家搵到幾多個真・香港地名，識北歐語言嘅朋友又睇下搵唔搵到啲譯名係對應原文邊個部分啦！同埋都希望遲啲可以出到其他北歐國家嘅地名港譯。

[舊使用者]

支持