粵民時報：粵人粵文: 「粵式書面語」

[sudo]

https://yatbou.blogspot.com/2014/09/blog-post_19.html

張貼時間：19th September 2014，張貼者：粵民時報 Cantonese Express

粵人粵文: 「粵式書面語」

注：下文所講嘅「書面語」係指現代標準漢語，並非Written Cantonese

唔做過校對，都唔知自己係用緊「㗎」、「喇」、「咧」、「噃」寫書面語。
我曾經獨自校對過成百首粵語Rap嘅歌詞，聽落似乎「相當無聊」，但呢個經歷其實係幾唔錯。某啲「言文潔癖者」，一方面叫人「寫所有華人都睇得明嘅行文」，但又要「講最地道嘅粵語」，呢啲根本就係祗能「刻意經營」，對一般人來講，更多嘅係大量（北方官話）書面語用詞「入侵」口語，最終令粵人（Cantonese People）講嘢都書面語咗。

我哋寫文嘅時候，有意避開啲有音無字、異寫太多嘅字，最終嘅行文就係：「是」寫成「係」、「來」→「嚟」、「的」→「嘅」、「喺」→「在」、「這」、「那」變成「呢」、「嗰」；而嗰啲類似「laau2 gaau6」、「lai2 gai6」（筆者注：因爭議過大，呢度僅標出粵拼）之類嘅詞語，就慢慢會因為唔識寫，又或者用開書面語，最後寫成「麻煩」。

有人會話，我哋係有學者研究「正字」㗎嘛？首先，我會叫呢啲做「本字」，噉研究呢啲嘅學者自然就係「本字流」。而呢啲所謂嘅本字流一般都有個問題：意識形態先於學術；「粵語乃中原正音，點會『有音無字』？」於是乎，「佢」字唔寫得，此乃俗寫字，鄙也，要寫正字「渠」云云。但其實「渠」都係古人嘅俗寫字，本字有可能係「其」；又或者個「𨶙」字，有人話「𡳞」先至係正字，我相信呢個係閩語人嘅俗寫字，本字點解唔係「無卵袋」嘅「卵」？而且本字流同何文匯有同一個問題，就係「正啲唔正啲」，如果咁堅持要用「正寫」嘅粵字，噉點解「脷」唔寫返「利」、「膶」唔寫返「潤」？更加唔好講「蝦公」「蛤乸」要用方塊壯字嘅蝦【虫共】、蛤【那田】（上下結構）先至係正寫，雖然對於壯人來講呢啲一樣係俗寫字。而以我哋實用流嘅觀點，當然主張粵人造字，而且要令寫粵文成為習慣，喺用嘅過程入面去發現并解決問題，而呢個我哋可以日後詳談。

言歸正傳，當我哋唔係筆談或者寫文，而係以粵語創作，然後再去寫字幕，我哋就可以睇到，我哋平時嘅所謂「粵文」，究竟流失咗幾多固有嘅粵語詞。

毆（Au3）跛雙腳——打跛雙腳

擪（Jip3）衫袖——捲起衫袖

擗（Pek6）咗佢——丟（Diu6）咗佢

過（Go6）制——過癮

趻/𧿒（Dam6）油——踩油

趷（Gat6）下趷下——拐下拐下
……

右邊嘅用詞都好口語㗎，但原本幾個同義嘅用法，由於大家唔知個字點寫，或者由於音變，大家就會慢慢揀咗個有常用字嘅寫法；噉就更加唔好講，嗰啲長期「浸淫喺書面語語境」啲人嘅用詞會係點。

唔知大家有冇發現，而家好多人都用「危險」代替「牙煙」；以前嘅粵人叫「蚯蚓」做「黃犬」？由於粵語固有詞同「教學用詞」係兩套體系，所以青蛙、蜘蛛、鍍鋅鐵先至係學名，而田雞、蠄蟧、鍟鐵就係俗稱，上課都唔教嘅詞彙，單靠民間嘅口耳相傳又維繫得幾耐？再惗深一層，上課都唔畀用口語（直接「文讀」書面語），粵語入文又點可能由所謂「粵白」提煉至「粵文」？

教書唔畀用口語（同上），民間用就一般維持喺筆談、對白或者文章嘅原話節錄，以純粵文創作嘅只係少數，因此好多精妙、啜核嘅用詞都只會喺口語創作度出現，但嗰啲唔係「粵文」，而係字幕。

最後，本人列舉一啲詞匯同大家分享。

食豬扮老虎：出自大懶堂嘅『圍威喂』，原本係「扮豬食老虎」，由於歌嘅主題係講叫雞，因此衍生該詞。食豬，顧名思義係食處女，而且仲要扮老虎噉去食，可見一般雞蟲嘅心態。

老閪散：出自精，氣，神（一個廣州Hip-Hop組合）嘅『亞Bling哥』，其實老閪散就係K粉，因為人嗍（Sok3）咗K之後，口齒不清，貌似老老閪閪，因而得名。

狐人：出自精，氣，神『補牙窿』嘅歌詞「呼吸外省叔叔甲某乙某當選今屆湖人隊隊長嘅惡劣傳聞」，因同湖人同音，係形容有臭狐嘅人。

紅日（Jat2）：『紅日』係畸詩『九十年代曲』其中一首歌嘅名，全碟嘅歌名都係同九十年代嘅流行曲相同，而呢首歌就係食返李克勤「紅日」嘅字，而讀法就變調讀紅日（Jat2），其實係指日曆上嘅紅色日（即假日），成首歌講嘅係打工仔嘅心態。