港產片曾有嘅國際視野係咪已經銷聲匿跡？

[恆智德]

八九十年代，港產片黃金時期，曾經出現過唔少取景同取材外國嘅電影，比如

1984年《最佳拍檔之女皇密令》 (Wikiless)，最佳拍檔輾轉巴黎香港大戰國際犯罪集團
1987年《秋天的童話》 (Wikiless)，香港人喺美國挨世界
1987年《飛鷹計劃》 (Wikiless)，成龍帶隊去非洲尋找納粹寶藏

1991年《縱橫四海》 (Wikiless)，講述跨國大盜嘅愛恨情仇
1991年《非洲和尚》 (Wikiless)，中國僵尸大戰非洲僵尸
1995年《紅番區》 (Wikiless)，成龍勇鬥美國黑幫
1996年《警察故事4之簡單任務》 (Wikiless)，重把炮，皇家警察偵查核子武器
1996年《伊波拉病毒》 (Wikiless)，黃秋生南非染毒後又走返香港播毒（開場十分鐘已經cult過《人肉叉燒包》十倍，呢度有得睇 ）估下邊個係監製？
1997年《一個好人》 (Wikiless)，成龍大戰澳洲黑社會
1997年《春光乍洩》 (Wikiless)，基佬喺阿根廷分分合合
1998年《我是誰》 (Wikiless)，一個中情局香港特工空難後失憶並流落非洲，重新尋找記憶

00年代都有幾部，不過故事發生地就從歐美變成亞洲 ：
2005年《喜马拉亚星》 (Wikiless)，香港人印度歷險記
2005年《韓城攻略》 (Wikiless)，講國際僞鈔集團
2009年《新宿事件》 (Wikiless)，中國偷渡客喺日本掙扎求生

呢十幾年來似乎唔多覺上面呢種港產國際電影
大家有乜補充？

[恆智德]

漏咗部經典
1989年《英雄本色III夕陽之歌》 (Wikiless)，講Mark哥發跡之前喺越南搏殺嘅故事

[恆智德]

2001年重有一部《特務迷城》 (Wikiless)，講成龍喺韓國同土耳其捲入跨國間諜案
呢套戲都係成龍喺嘉禾嘅告別演出

[恆智德]

@恆智德 同年重有《瘦身男女》 (Wikiless)，講旅日肥仔肥妹嘅愛情故事

[恆智德]

84年《快餐車》 (Wikiless)，成龍元彪洪金寶西班牙冒險故事

[海印市民]

唔止少咗「國際視野」，就算係本土製作都少咗題材。

舉個例，80年代連盧冠廷都可以做主角拍文藝片……
唔係話盧冠廷做戲唔好
但係可唔可以想像今日香港拍戲係一個外國返來嘅冇乜經驗嘅人去擔正？
80年代一年幾百齣戲，依家一年40都偷笑。

又譬如三人新世界呢種香港都市愛情片
依家冇咗
真係撓晒頭
過咗30年，反而都市中產文藝片咁大路嘅題材會好少見

一方面，電影市場萎縮
另一方面，荷里活越來越勁
香港d低成本完全冇得揮
本來如果大陸開放，可以發大來做嘅
都mou2話全國市場啦 就廣東都夠做啦
一方面市場翻10倍大，另一方面廣東經濟快速發展就如香港50-70年代
市場潛力好大，成本又可以保持低廉

至弊共產黨治下一d自由都冇吖嘛

[恆智德]

原來李小龍有兩套港產片都喺外國拍，一套係1971年取景泰國嘅《唐山大兄》 (Wikiless)

另外一套係1972年取景意大利嘅《猛龍過江》 (Wikiless)，香港電影史上第一部遠赴歐洲取景嘅電影

[海印市民]

新藝城拍唔少
有齣戲我幾中意
英倫琵琶

[海印市民]

洪金寶張曼玉有齣過埠新娘
富貴逼人有一集係移民加拿大
董驃仲有一齣四人新世界 又係移民加拿大
張英谷峰狄龍有一齣又見冤家 移民加拿大
李連杰龍行天下 移民美國
香港回歸嘅陰影 即刻反映喺電影創作
以上5齣都幾好睇嘅 幾好笑

唉 噉就三十幾差唔多四十年嘞 時局仲衰過舊時

[恆智德]

@海印市民 七十年代從李小龍開始就識得全球發行，食四方飯，等到00後全球化時代反而不思進取賺人仔，返大陸打白粉針,卒之被吸走曬精氣神

[海印市民]

王晶隻冚家鏟嘅戲係一個板來
條肥閪每十年八年就自我抄襲一次

80年代初有齣千王（謝賢etc做）->90年代有齣梁朝偉葉子楣做->2000年左右張家輝關秀媚

賭神 -> 賭神3 -> 賭俠大戰拉斯維加斯 -> 澳門風雲

五億探長 -> 金錢帝國 -> 追龍

呢幾條自我抄襲鏈，都係越做越衰
殊不知王晶都拍過與龍共舞噉樣非屎尿屁嘅都市愛情喜劇
點解就唔能夠做好佢 做得好好睇睇呢？

我唔係將其他人比作王晶 話個個都賤格
而係從王晶d戲（一路到依家d狗屎垃圾，票房都仲係大賺）
可以睇出港產片一個困境
個市場 d觀眾 口味就係噉
加上共產黨影響
點有自由創作、佳作呢？

[恆智德]

@海印市民 資本始終都係逐利至上，唔單止要搵大錢，重要搵快錢

一來廣東市場就算攬曬都唔夠全國其他地方加埋
再講廣東觀衆都有番咁上下質素，唔似内地省份隨便整部狗屎垃圾都收貨

計番條數，點都上大陸撲水著數，泵水畀香港市場正懵炳
班老油條導演編劇同演員都一拍即合，求其拍部交功課都賺到盆滿缽滿，鬼得閑同你推陳出新，精益求精

大陸完全開放電影市場，分分鐘拉低埋荷里活質素

[海印市民]

正話睇英倫琵琶宣傳片
睇到尾d鴿醒起另一齣戲叫 表哥到
片頭吳耀漢喺廣場捉鴿 好好笑
https://youtu.be/d6U5QfM1u1U (Invidious)

[海印市民]

網上搵粵文版表哥到搵唔到

[ashes]

我諗係因為：大導演去咗拍合資戲，後生仔冇錢唯有拍D格局細D嘅戲。

其中一個原因可能係因為簽咗CEPA。杜琪峯講過，電影係一門生意。票房要達到投資嘅三倍先至算盈利，但香港電影嘅市場日益萎縮，呢一點好難做到。喺中國，《美人魚》呢啲野都可以搵到好多錢，廣闊嘅市場得到投資人嘅青睞，所以北上成為好多導演嘅選擇。CEPA對題材同演員都有限制，所謂「故事情節或者主要人物同中國有關」，情節又要比中國審查。成龙嗰出《新宿事件》因為戲中嘅中國人都唔係正面形象所以比話傷害中國人感情而禁播 。

具體可以參考呢篇文章 https://www.master-insight.com/杜琪峰：很多人問香港電影是不是消失了，其實不/

[恆智德]

1989年關錦鵬導演《人在紐約》 (Wikiless)，講從香港、台灣和上海來嘅三個女人喺美國紐約嘅遭遇，由張曼玉、張艾嘉、斯琴高娃主演，包攬當年金馬獎八項大獎

[恆智德]

@恆智德 在 香港電影曾有嘅國際視野而家好似銷聲匿跡？ 裡說：

1987年《秋天的童話》，香港人喺美國挨世界

此爲張婉婷導演「移民三部曲」第二部，另外兩部係1985年《非法移民》同1989年《八兩金》：前者講非法移民喺美國假結婚，後者講美國華僑返大陸訪舊

[恆智德]

@恆智德 在 香港電影曾有嘅國際視野而家好似銷聲匿跡？ 裡說：

1991年《縱橫四海》

原來呢部戲係紅姑倒數第二部，都係佢同發哥最後一次合作
92年之後紅姑就安心相夫教子

[恆智德]

1989年《愛人同志》，華仔紅姑大傻主演，講一個香港記者去越南公幹卻因交通事故同牽涉民主運動而兩次被捉去勞改，最終不堪非人待遇而同其他人一齊逃獄

[恆智德]

@ashes 兄台好耐都無上過來了

[四邑漁農牧工商總會]

冇錢，外國外景拍攝好燒錢，機票，酒店，出差津貼，如果請當地演員，又要俾錢

以前梅豔芳譚詠麟張國榮羅文拍MV去外國拍，成本高，但賺得返錢，唔會蝕，現在港產片同本土音樂萎縮，成本壓縮得好緊要。你睇以前香港小姐亞洲小姐飛去外國拍，家陣去長洲，澳門，西貢，深水灣淺水灣拍就知，真係冇錢

[四邑漁農牧工商總會]

家陣傳統媒體，電視台電台報社報館出版社萎縮得好緊要。早幾年新城大地震，新城台長邀容祖兒參加新城音樂頒獎禮，容祖兒話冇期，推左，台長接受採訪，舉中指推眼鏡架，俾記者影到，話佢舉中指屌容祖兒，之後英皇施壓，新城順路炒左好多人，包括台長、路芙、杜浚斌，其實係順水推舟，因為新城賺唔到錢，借機炒左班人工高的舊人壓縮成本

蘋果股價昇係因為一榨高層被捕，市場憧憬一傳媒結業，賣塊工業區總部及印刷廠地皮出黎，係炒作地產。以後如果TVB執，TVB將軍澳電視城同西貢邵氏影城塊地都好值錢。傳統媒體，電視台電台報社報館出版社最值錢係塊地，執左仲好，塊地賣返出黎，或者攞塊地投資，攞筆錢投資

[Rehk]

師兄好耐冇見

[恆智德]

@恆智德 1984年《英倫琵琶》，主要劇情都向倫敦，竹升幫辦+香港監墩 聯手破案
https://xsden.info/topic/1255/

[恆智德]

@海印市民 王晶長做長有全靠大陸條水
香港仲邊有人睇佢？

[港產片語料]

香港電影之衰落，其實係香港衰落嘅縮影；
而香港電影衰落之根本，亦係香港衰落之根本
——從胸懷全球到擁抱中國，從食四方飯到傍住大陸一條水喉搵快錢啪毒丸，漸漸樂不思進，泥足深陷

駐台馬來西亞華人杜晉軒對此有點睛之論（14:10起）：
https://www.youtube.com/watch?v=7YpdM6hN8Ss (Invidious)

[港產片語料]

@四邑漁農牧工商總會 喺 港產片曾有嘅國際視野係咪已經銷聲匿跡？ 入面講：

冇錢，外國外景拍攝好燒錢，機票，酒店，出差津貼，如果請當地演員，又要俾錢

冇錢係一方面，心息先大劑