【講古仔】 樓主講古直播中

[親衛隊]

@薯皮 原來峨嵋山入咗花生友

[薯皮]

「呵，你講乜啊？你以為自己係咩新鮮蘿蔔皮啊？我要引你注意？」路千遙嬲到笑咗出聲，從來都冇見過啲咁自戀嘅人。

「聽住啊，無論你有幾靚都冇用。為咗溝仔，連死咗嘅人都利用。你只係一舊黑芯蘋果，發咗毛嘅豬扒嚟。」男仔而家㷫過焫雞，粗魯噉扯住路千遙條馬尾，然後喺佢耳邊講出一連串難聽嘅說話。如果路千遙唔係女仔嘅話，佢恐怕已經郁咗手。

「你講咩死人啊？我都唔知住講乜！」路千遙撥開佢嘅手。

男仔見路千遙仲唔認錯，嬲到握實拳頭，用力深呼吸。強壓住怒火，對佢講：「阿陽佢喺五年前已經死咗......」

阿陽......係溫皓陽？

「呃......呵呵......你哋兩個就算感情唔好，呢啲說話唔可以亂講喎。」路千遙心裡一寒，有啲反應唔嚟，覺得男仔只係講笑。

路千遙嘅右手偷偷摸一摸自己隻左手，嗰晚溫皓陽捉住自己隻手，溫皓陽手心嘅溫度同捉住佢嘅力度，佢依然記得。手上嘅觸感同一瞬間嘅心動，深深刻喺心裡面......

「佢係喺五年前被貨車撞死......你滿意未？」男仔呢句說話，輕易就打碎路千遙嘅希望。

路千遙同男仔無言對視，黃昏橙紅色嘅陽光照喺佢哋身上，好似加咗一層濾鏡。如果忽略佢哋之間濃烈嘅火藥味，呢個的確係一個浪漫而又唯美嘅畫面。

「皓晨！」一把甜美嘅聲，打破咗佢哋嘅緊張對峙。

「阿籬。」男仔即刻將臉上恐嚇嘅表情換成溫柔嘅笑容，好似直接換咗個人一樣。

噗咚......噗咚.....

好耀眼......心跳因為佢而失去控制......呢啲就係初戀嘅感覺？

路千遙呆滯噉望住向佢哋跑過嚟嘅清純姐姐，真係靚到沊一聲。好似藝人一樣完美嘅五官，簡直天使一樣。唔止......係女神先啱。

男仔對住女神姐姐嘅笑容，的確同溫皓陽似到十足十。但仔細睇嘅話，都可以睇得出分別。

溫皓陽嘅笑容好似冬日太陽，溫暖而又充滿感染力，令人好深刻。而男仔嘅笑容就好似夜空嘅星晨，都有佢嘅魅力，不過同太陽或者月亮相比嘅話，更加易被忽略同遺忘。

雖然路千遙唔甘心，但冇可否認，男仔嘅外表真係幾出眾。同女神姐姐企埋一齊真係好襯，好養眼。

「呢個妹妹係邊個啊？個樣好可愛。」女神姐姐笑得好甜。

「我......我係路千遙！」路千遙紅住臉，怕羞噉自我介紹。

「你好，我叫江籬。」女神姐姐對佢伸出友誼之手。

「吼......」路千遙睇到眼前白滑嘅手，忍唔住低聲讚嘆，然後吞一吞口水。

「咳咳咳......」下一秒佢意識到自己好似痴漢，就掩飾噉咳幾聲。然後一臉羨慕同崇拜，對女神講：「江籬......用中藥名做名，真係好好聽。」

「好勁，估唔到咁細個都對中藥咁有研究。」江籬讚賞噉講。

「之前諗角色名有睇過吓......」路千遙講到一半，突然靈光一閃。

等等，自己好似真係曾經寫過一個女主角叫江籬......

[薯皮]

「江籬？」路千遙用手指指向江籬，想確定自己冇聽錯。

江籬點點頭。

路千遙嘅手指轉向男仔，等佢講出佢自己嘅名。

男仔喺江籬睇唔到嘅角度，對路千遙反咗個白眼。佢嘅表情好明顯喺度鄙視路千遙，心諗：自己果然冇估錯，眼前個女仔果然想溝佢。

「溫皓晨。」男仔猶疑咗一陣，自講出自己個名。

「呃人㗎......」聽到一個熟悉嘅名，路千遙抱住頭，唔敢去相信。

「咩呃人啊？」溫皓晨對路千遙嘅印象好差，已經開始唔耐煩。因為江籬睇住，佢暫時唔可以發火。

「喂！唔舒服？」溫皓晨發現路千遙低住頭，臉色蒼白，於是推一推佢嘅膊頭。

「砰！」

溫皓晨一時唔為意，被路千遙反手推落地，狼狽噉坐喺地下。

「你嚿黑芯蘋果啊！」佢睇到路千遙推完自己，仲要即刻轉身逃走。控制唔住要爆喇，爬起身準備追上去，但被江籬阻止。

見江籬驚訝噉望住自己，溫皓晨意識到自己一時唔小心破壞咗人設，所以尷尬噉解釋：「頭先個女仔食咗嚿黑芯蘋果啊，所以肚痛......哈哈......」

江籬留意到溫皓晨手上嘅傷，心疼噉問：「你對手臂發生咩事啊？點解傷晒嘅？被大狗整傷？」

「冇嘢......」溫皓晨怕江籬擔心，所以快手拉返埋衫袖。啲傷口係幾日前瞓醒發現，佢都唔知點解。

幾日前......抓痕......四腳獸......

溫皓晨突然諗通啲嘢，即刻抬頭望向路千遙跑走嘅方向，但已經搵唔到路千遙嘅身影。

路千遙第一次寫古仔係喺五年前，當時只係個小學生。post喺一個唔出名嘅討論區，冇乜人睇，自己又冇恆心，寫咗三千字左右就放棄咗。

路千遙隱約記得自己寫嘅內容同古仔名，所以好順利就摷返個舊古出嚟。

女主係江籬、男主係溫皓晨、男配係溫皓陽......

「呃人㗎......」路千遙望住呢三個熟悉嘅人名自言自語，心情好複雜同沉重。

原來唔止自己寫嘅甜文成真......連舊文都係......

個舊古叫《借心還魂》，係一個愛情加靈異嘅三角戀古仔。係講男主溫皓晨患先天性心臟病，長期住醫院，性格陰森。

男配溫皓陽係佢嘅孖生阿哥，好似太陽一樣耀眼嘅存在。唔止有一個健康嘅身體，仲文武雙全，女主江籬係佢女神級嘅女朋友。

溫皓陽完全係一個人生贏家嘅人設，令溫皓晨崇拜而又妒忌嘅存在。佢想成為溫皓陽，想有健康嘅身體，想好似溫皓陽一樣打籃球，想有好似江籬一樣完美嘅女朋友......

故事由溫皓晨行出馬路自殺開始，結果被溫皓陽推開，死嘅人變咗做溫皓陽。而佢移植咗溫皓陽嘅心臟，終於得到一個健康嘅身體，得到所有自己想要嘅嘢，但就失去咗自己嘅好兄弟。

事後溫皓晨發現自己嘅身體有啲唔妥，會間歇性失去記憶。病徵有啲似雙重人格，但其實係因為一個身體住咗兩兄弟嘅靈魂。之後為咗女主江籬，兩兄弟開始咗身體嘅主權爭奪戰。

[薯皮]

@親衛隊 你係兩大字頭嘅阿頭

[親衛隊]

@薯皮 薯衛兵係第一大勢力，夠人發起罷工