【講古仔】 樓主講古直播中

[薯皮]

@親衛隊 都係得我哋玩

[自動書記]

@薯皮 係BL故？女主角個名讀落似「老千」，起名嗰陣就諗住用寫故出千？

[自動書記]

@親衛隊 好吖

[薯皮]

@自動書記
啲名係我亂改，我係改名垃圾

[薯皮]

聽到個三字，路千遙狠心噉自己一個跑向公園嘅出口。而溫皓陽都走出草叢，引開四腳怪獸嘅注意。

四腳獸發現自己啱啱被溫皓陽呃咗，眼神充滿殺氣噉睥到佢實。喉嚨一直發出威脅性嘅聲，隨時會襲擊佢。

冷風吹過，令路千遙嘅頭腦終於都冷靜返些小。佢因為溫皓陽嘅說話，突然靈光一閃。有一個大膽嘅辦法去救溫皓陽，如果自己寫嘅嘢真係有可能成真......

路千遙拎起電話睇，見到自己之前post咗嘅嗰章甜文，文字變成彩色，劇情都因住自己嘅出現而改變得面目全非。

“四腳獸嘅活動範圍唔能夠離開廁所一百米。”路千遙快快手手增加一個設定post上去。

而喺呢個時候，溫皓陽已經成身傷痕，被四腳獸壓住。佢跑到喘曬氣，已經係半放棄狀態。

「我地嘅故事，終於都要完，唔洗再受作者控制......」佢無奈噉望住天上面嘅月亮，一邊用語氣嘅溫柔自言自語，感覺好似同另一半講嘢。合埋眼，準備好離開呢個唔值得留戀嘅世界。

「嗚嗚！」

突然有一種無形嘅力量，將四腳獸拉返入殘廁。四腳怪獸跑返出嚟，但跑到一百米左右，就好似撞到一個透明嘅牆，無辦法前進。

「點解......」溫皓陽被呢個情況嚇傻咗，不過好快就定神。用力支撐起自己傷痕累累嘅身體，離開呢個公園。

「喂！溫皓陽！」路千遙跑返去公園搵溫皓陽，但溫皓陽已經好似上次噉消失咗。

現場只係得返四腳獸不停向前撞，但好似被牽制喺某一個活動範圍。叫聲好大聲好惡，感覺隨時會震爆人耳膜，好得人驚。

「而家點算好，係咪要報警？」路千遙聽住四腳獸嘅叫聲，覺得好頭痛。報警又怕冇人信，由得四腳獸喺度又怕會傷害到路人。

路千遙坐喺附近公園嘅韆鞦，守住公園入口唔畀人接近。

身為一個某登仔，解決問題嘅最正確答案應該係影相放上討論區。但如果佢嘅能力係真，一定會畀人捉去當怪物研究或者被中共利用，統一世界。

路千遙摸一摸自己個良心，仲喺度，未跌......所以唔想噉......

既然自己寫嘅嘢可以成真，佢決定快快手手寫一個大師級人物收咗隻怪物算喇，唔洗煩。

「嗚啊！」

路千遙都仲未落手打文，就聽到四腳獸淒厲嘅叫聲。佢即刻企起身，望向殘廁嘅方向。但淒厲嘅叫聲之後，四圍就靜默一片。

「吱吱吱......」

路千遙隔離嘅韆鞦坐位忽然慢慢前後搖，發出老舊嘅「吱吱」聲。佢哨到紅色嘅裙角坐喺韆鞦上面，一對幼細嘅雙腳，輕快噉踢腳。

路千遙有種不祥嘅預感，唔敢光明正大回頭睇，眼角哨住紅裙細路女嘅背影。

自己明明一直守喺度，個細路女究竟幾時坐喺佢隔離㗎......

[薯皮]

暫時唔會寫BL
我有個朋友又係好鍾意睇BL，佢應該會想我寫
但我一向係自由去作，自己都劇透唔到劇情

[薯皮]

細路女好似感覺到佢視線，用綉咗花嘅紅鞋鞋尖撐住地面，然後問佢：「姐姐，你喺度望咩？」

「係咪搵我啊？」細路女轉過頭，對路千遙露出詭異嘅笑容。

「我......我唔知......」路千遙唔知自己應該答係定唔係，明明直覺叫自己千其唔可以應呢個細路女，偏偏把口就似唔受控制。

「唔知？真係可憐，不如就等我將答案話畀姐姐聽。只要跟住我行就得，好唔好？」細路女行到路千遙面前，用冰冷嘅手拖住佢。

「唔好......唔好......」路千遙用抖震嘅聲線細聲反抗，但手被細路女扯住行。

四圍嘅環境慢慢起咗一層厚厚嘅白霧，佢哋前進嘅方向出現咗變咗做高樓大廈嘅天台邊。腳下就係璀璨嘅街道燈光，一叉錯腳就會實死冇生，路千遙依然不受控制噉跟上去。

「唔好......」路千遙不停重複住呢兩個字，但聲量太細，好似自言自語，只有佢自己聽到。

「唔好......」路千遙完全控制唔到自己嘅身體，都搞唔而家係咩情況。

睇住自己嘅腳準備要踏出天台，跌落璀璨星光一樣嘅街道。佢覺得好絕望，估唔到自己噉後生就要死，仲要死得不明不白。

「喵~」

突然遠處傳嚟一聲貓叫聲，路千遙感覺自己可以重新控制自己嘅身體，即刻收返自己伸到一半嘅腳。白霧消散，四圍嘅環境又變返起初嘅公園。

「係邊個啊！」隔離嘅紅衫細路女好嬲噉大叫。

「喵~」一隻戴住紅色蝴蝶結嘅黑貓跳到佢哋眼前，用血紅色嘅雙眼狠狠噉睥住細路女。

「紅色蝴蝶結嘅黑貓？啫係話嗰個傳聞中嘅天材靈媒都喺度？」細路女驚恐噉望住黑貓，一個轉身就消失喺原地。

「天材靈媒？」路千遙望住細路女消失嘅方向，覺得好疑惑。

頭先自己明明咩設定同文都未開始寫，點會又出現靈媒大師、靈體、黑貓之類......而家發生嘅所有事，都開始脫離佢認知嘅常理。

「喵~」黑貓慢條斯理噉行到路千遙腳邊，用頭上嘅毛輕輕力磨擦佢隻腳同嗲佢。

「多謝你。」路千遙覺得自己好似執返條命，面對呢隻可愛嘅黑貓，心裡面都多咗幾分親切感，伸手輕輕摸黑貓嘅毛。

路千遙由細到大都好鍾意貓，好想養，可惜屋企人唔畀。

「伊利沙白？叫你伊利沙白好唔好啊？」路千遙期待噉問，呢個名佢一早就想幫自己隻貓改，如果佢可以養嘅話。

「喵喵~」黑貓好似好鍾意呢個名，開心噉回應佢。

「咻咻！」

附近傳嚟一聲口哨聲，黑貓聽到之後退後幾步。路千遙直覺覺得黑貓對佢微笑咗一吓，就轉身跑向聲音嘅方向。

路千遙望住黑貓消失嘅背影發吽逗，突然醒起黑貓離開嘅方向，正正就係四腳獸被困住嘅地方。

「等等！」佢怕黑貓有危險，心急噉追上去。

[薯皮]

如果可以不推文就好喇
下次再有古就開喺R18

[親衛隊]

@薯皮 呢度又冇熱門 ，推唔推咪一樣

準備寫甜故？

[薯皮]

@親衛隊 唔係，講笑

[薯皮]

@親衛隊 死喇，我有啲想大執個古

[親衛隊]

@薯皮

[薯皮]

@親衛隊 我想個古搞笑啲啊，雖然我唔識搞笑

[親衛隊]

@薯皮 寫主角盡力寫搞笑故但係出嚟個效果一啲都唔搞笑嘅呢件事本身就好搞笑

[薯皮]

@親衛隊

[親衛隊]

@薯皮 認真㗎，主角個人設可以係一直想寫搞笑故，好得意

[薯皮]

@親衛隊 以為你講我

[親衞隊]

樓主係咪諗住重製成個故？

[薯皮]

殘廁附近都好安靜，好似四腳獸從來都冇出現過，一切都只係一場白日夢。當留意到地面有野獸一樣嘅抓痕，路千遙就知道並唔係夢。

抓痕附近仲有粒黑色嘅珠仔，佢好奇噉拎起嚟觀察，溫熱嘅體溫嚟黑色珠嘅表面開始溶。佢聞一聞，上面帶住朱古力嘅香甜味。

麥提莎？

睇到自己喺討論區嘅甜文同現實掛鉤，路千遙開始有啲怕去更新。呢幾日都心事重重，完全唔似佢平時開朗嘅性格。

「千遙啊，你係咪已經放棄咗個古仔？」王樂怡有啲擔心噉問。佢係路千遙嘅同學，都係佢嘅忠實讀者。

「想棄喇。」路千遙老實噉答佢，然後認真噉講出自己嘅煩惱：「如果有一日，你寫嘅甜文變成現實，你會點做啊？」

「係就爽喇！」王樂怡拍一拍手。

「點解？你要做瑪莉蘇女主角？」路千遙對佢嘅答案好有興趣。

「先唔係，你當我變態啊？」王樂怡即刻反駁，然後講笑噉講：「如果可以成真，當然要寫越娥振鷹愛情古喇！」

「你用兩個加埋過百歲嘅狗男女做主角，仲變態過你寫自己做主角啊......」路千遙只係想像吓個畫面都想嘔啊，但用嚟伏吓讀者嘅話，又好似幾得意。

「唔核突嘅話都唔會叫你寫喇，哈哈......你連四腳獸都寫得出甜文，我信你得嘅。」王樂怡拍一拍路千遙膊頭。見佢開心返，好似平時噉講笑，都放心唔少。

「你仲提四腳獸！差啲就出事喇......」路千遙細細聲抱怨。有好多唔純潔嘅知識都係喺王樂怡身上學返嚟，佢簡直係首席最佳損友，跟得佢多思想只會越嚟越變態。

上次王樂恰講四腳獸嘅都市傳說，其實係假㗎。純粹見路千遙咁好呃，覺得好好玩。

「見你咁鍾意聽，今次同你講多個真㗎喇，喺天水圍嘅都市傳說。」王樂怡興奮噉講。

「係咩啊？」今次路千遙聽鬼古嘅反應，唔似得平時咁期待。握實拳頭，因為心裡面嘅不安，手心冒出冷汗。

嗰晚，佢的確撞到嗰啲嘢......

「係天水圍嘅迷路女童......」王樂怡露出一個陰森恐怖嘅表情。

路千遙嘅腦海閃過嗰晚見到嘅紅衫細路女，佢飄逸嘅紅裙、佢對自己講嘅說話、佢詭異同令人心寒嘅笑容......

「夠喇！」路千遙打斷王樂怡嘅說話，心情好複雜。佢對呢個都市傳說雖然好奇，但又好怕聽落去。

「做乜咁大反應？靈感到？」王樂怡發現佢唔妥，都收起嘻皮笑臉嘅表情。

「嗯......對唔住，留返下次再講我聽啊，我今日想早啲返去打文。」路千遙唔想對方太擔心自己，勉強露出一個笑容安撫佢。

路千遙放學返到屋企之後，見到有讀者催佢更新。如果係平時，佢的確會好開心。但自從知道自己寫嘅嘢會成真，佢開始覺得好大壓力。

不如就好似王樂怡所講，借班高官賤種仲有班死黑警嘅名寫甜文，好似都唔錯......

[薯皮]

@親衞隊
只係執吓前邊啲唔太順同埋唔到嘅位
當然，都有可能執完會更加膠

[親衞隊]

@薯皮

[薯皮]

“喺魔界嚟嘅男人，冚嘭唥都係肌肉、粗壯、性感美男，真係好悶。阿希已經食到厭晒，好盲目。佢冇咗當初嘅激情，好想轉一轉口味。

「咚咚......」

殘廁外邊傳嚟嘅敲門聲，終於打破咗阿希沉悶嘅殘廁生活。

「我係警察，最近收到投訴，呢度嘅殘廁成日乒鈴嘭唥，我有合理懷疑先生你用公眾地方經營色情事業。」一個肥頭得意，有幾分似大蕃薯嘅sir將阿希喺殘廁叫出嚟，抄底佢嘅個人資料。一見到佢，阿希沉寂咗嘅心，再一次跳動。

「唔好搞我後邊！」蕃薯sir感覺到有人搞佢後面，轉頭大聲吠。

「我只係忍唔住......」阿希同蕃薯sir深情對視。”

「最近連續有數十位嘅警員得到不明怪病，病者死亡率接近七成。其中一名患病男警員於今日晚上去世，終年五十三歲......」

「Tang Sir......Ping Sir......Keung Sir......」甜文主角阿希睇到電視新聞之後，痛苦噉抱住自己嘅頭，悼念自己啱啱香咗嘅幾位情人。

第二十個同佢有過關係嘅人，都因為嗰個怪病，而離開呢個世界......

阿希自從上次被四腳獸襲擊之後，佢嘅愛好同口味都變咗，新識嘅一班SP咁啱全部都係警察或者高官。又老又油頭大肚，有啲甚至係女人嚟，個個都奇珍異獸嘅款。

沒有最樣衰，只有更樣衰。

明明佢以前係正常審美觀嘅零仔，而家變咗精力充沛嘅一仔。日日夜夜喪屌班異獸，仲要越嚟越重口味。

又咁啱同阿希搞過嘢嘅，全部都中咗晒呢個不明怪病，佢覺得好可惜同心疼。

阿希開始懷疑自己就係嗰個怪病嘅傳播源頭，不過身體暫時都冇忽唔妥，應該冇事。佢都擔心太接近班警察同高官，自己隨時會中埋。

但佢真係唔捨得放棄十月懷胎一樣嘅大肚sir、著制服陪佢玩SM嘅抖m sir、又man又擁有迷人肥仔波嘅大波sir......

「第二十個......」同樣震驚嘅，仲有睇到同一段新聞嘅路千遙。佢嘅嘴唇嚇到有啲抖震，講唔出任何說話。

人......係佢殺嘅？

呢個正正就係路千遙新寫嘅劇情，凡係同甜文主角阿希搞過嘢嘅，都會惹到一種不明怪病。

佢原本只係想惡搞吓，想班賤種有報應，諗唔到會咁嚴重。而家甚至因為源頭不明，搞到個個都市民人心惶惶。

「第二十個啊......哈哈......哈哈哈哈哈......」路千遙抬起頭，對住天花板瘋狂大笑。直到笑到肚痛，笑到攰先肯停。

企起身，由自己間房跌跌撞撞噉走入廁所，將自己鎖喺裡面。開大凍水洗臉，冷靜一吓自己。

唔係啊，佢只係喺寫啲惡搞內容上網。噉樣唔算殺人，自己乜都知，唔知會成真㗎......佢一邊洗臉，一邊喺內心自我安慰。

「唔係啊。」突然一把熟悉嘅女聲，打斷佢嘅思緒。

[薯皮]

「邊個！」路千遙即刻反手扯開隔離嘅浴簾，裡面一個人都冇。佢拍一拍心口定一定神，以為只係心理作用。

「如果得一個死，純粹係咁啱。但二十個呢？你明知自己寫嘅嘢會成真，但你都係寫咗......」耳邊傳嚟嘅女聲呆滯平板，完全冇高低起伏噉繼續講。

路千遙瞪大眼，唔敢回頭。黑色嘅眼珠偷偷哨向隔離嘅大鏡，鏡裡面嘅自己居然用正面面向住佢......

「啊！」路千遙嚇到心跳差啲停，忍唔住尖叫一聲。

腳軟嘅佢跌坐喺冰冷嘅地面，而鏡裡面嘅自己雙目冇神，只係一直定定望住佢嘅狼狽樣。

「呯呯呯！」

「嗄！」路千遙緊張噉同鏡裡面陌生嘅自己對視，身後突然傳嚟敲門聲，再一次嚇到佢彈起。

「遙遙！你係咪跣親啊？有冇事？」同佢一齊住嘅婆婆聽到尖叫聲，即刻拍門問。

路千遙望一望塊鏡，發現已經恢復正常，佢嘅心跳依然好難去平復。怕婆婆擔心，唯有將呢件靈異事件埋喺心底。

係咪最近做得虧心事多呢？

就算班黑警係抵死，路千遙都覺得係自己間接害死佢哋。所以都心事重重，疑神疑鬼。起初寫文純粹為好玩，佢估唔到會搞出噉多事，都發現咗自己嘅特殊能力。

果然......都係放棄寫古比較好......

路千遙啱啱升起棄文嘅念頭，佢就喺電視到警暴嘅新聞。怒火一時間湧上心口，但又無辦法去發洩。

佢哋會有報應......會有報應㗎......

「路千遙，想唔想報仇啊？」

聽到熟悉嘅女聲，路千遙問坐喺佢隔離嘅細姨：「呃......細姨，你啱啱同我講嘢？」

「嗯？冇啊！」細姨答佢。

「你哋有冇聽到聲啊？」路千遙唔死心，繼續追問。

「咩聲啊？」細姨覺得佢有啲奇怪。

「真係有把聲講......路千遙，想唔想報仇啊？」路千遙模仿頭先把聲嘅語氣。

「你係咪有幻聽啊？」細姨以為自己嘅姨甥女中二病發作。

「真係有！」路千遙努力想令對方相信自己。

「遙遙唔好再玩喇，快啲去沖涼。」婆婆打斷佢哋嘅說話，催路千遙去沖涼。

「我唔沖啊......」路千遙頭先先喺廁所遇到靈異事件，而家就算急屎急到瀨都唔會再入去。

「快啲！你個身咁污糟！」婆婆見佢唔聽話，就捉住佢訓話。

「係......」路千遙頂唔順先龜速執好衫褲。

佢入到廁所唔夠幾秒，就低住頭出返嚟，細聲叫一聲：「細姨......」

「做乜啊？你唔係去沖涼咩？」細姨唔耐煩噉問。

「陪我沖......」路千遙紅住臉抬頭，露出一個可憐又可愛嘅表情。

「路千遙你核唔核突啲啊，你今年十六歲，唔係六歲啊！」細姨即刻隨手拎起個坐墊掉過去，然後趕返佢入廁所。

「啊......」路千遙貼住廁所門哀鳴，但外面班長輩都完全唔心軟。

「喂。」

聽到熟悉嘅女聲喺身後叫佢，路千遙嘅身體瞬間僵硬，唔敢做任何反應。

[薯皮]

https://www.facebook.com/media/set/?set=a.3029394703737388&type=3&sfnsn=mo
其實如果全部都係粵文正字，應該都幾難去寫同埋讀

[親衛隊]

@薯皮 「hea」係起源自 「le hea」？

讀半邊一般都讀到喎

如果係古代漢語借詞，就話有正字啫。嗰啲侗台語詞源嘅（即係同壯語、越南語發音似嗰啲詞）粵語詞，古人借漢字表音，而家我哋咪一樣搵隻字嚟表音，分乜正唔正

[薯皮]

最重要睇得明啫

[薯皮]

「我叫你啊。」

路千遙嘅身後就係廁所塊大鏡，鏡裡面嘅自己正面面向佢，不停叫佢。

路千遙扮聽唔到同睇唔到，想直接除衫，快手快腳沖完個涼。感覺對方嘅視線，路千遙唔自在噉停低手上嘅動作，匿喺浴簾後面先除衫。

「聽唔到？」

聽唔到......聽唔到......唔好怯，一怯就輸成世㗎喇......

路千遙一邊喺心裡面提醒自己，一邊用電話播聖詩「亞利路亞」。開大花灑，然後不停跟住唱聖詩。

開頭怕被屋企人聽到，所以只係細細聲唱。後尾越唱越投入，越唱越大聲。拎住花灑頭，好似開個人演唱會一樣。

同路千遙住埋一齊嘅有公公、婆婆同細姨，三個長輩喺客廳食生果。佢哋聽住廁所傳嚟激昂版嘅聖詩，不約而同望向廁所門嘅方向，連口裡面嘅生果都唔記得吞。

沖完涼之後，路千遙煩緊應該點出去好，啲乾淨衫就係放喺大鏡前面。佢伸長隻手，盡量唔抬頭望鏡，嘗試去用手勾乾淨衫。

「啊！」一唔小心跣腳，下意識扶住塊鏡，借力企穩。唔小心抹走鏡上面嘅霧氣，一抬起頭已經同鏡裡面嘅自己對視。

死喇......

鏡裡面嘅自己同路千遙嘅氣質完全唔同，成熟而又有啲陰沉。身上外露嘅皮膚有大大小小嘅疤痕，雖然似係舊傷，但睇到依然都會戥佢痛。

「你果然見到......」佢勾起一個詭異嘅笑容。

路千遙伸出兩隻手指，插向對方對眼。但對方始終唔係真人企喺佢面前，發出兩隻手指「啪！啪！」兩聲，痛感瞬間好似電流一樣流過全身。

鏡裡面嘅自己被路千遙嘅傻仔行為嚇一嚇，好心噉問：「你有冇事啊？」

「幻覺嚟嘅啫，嚇我唔到嘅！」路千遙學食神裡面嘅唐牛，抬頭大笑三聲，然後快快手手著好晒衫。

「......」鏡裡面嘅自己無奈噉望全路千遙，然後問：「唔通你唔想報仇？」

「報乜仇啊？我呢啲小薯做到啲乜......」路千遙見冇得再扮盲扮聾，就抱住自己差啲斷嘅兩隻手指，死死地氣噉應對方。

「只要你想嘅話，就可以......」對方點點頭。

「你到底係邊個？」路千遙大膽噉問佢。

「我就係你。你由細到大，大大小小嘅事我都知得一清二楚，包括連你自己都唔知嘅嘢。」對方補充。

「砰砰砰！」

「遙遙沖完涼出嚟未啊？」

正當路千遙想問對方問題，就聽到屋企人拍廁所門催佢出嚟。

「而家出喇！」路千遙大聲答門外面嘅人。

只係轉個頭，鏡已經變返正常。

路千遙一打開門，就見到三個長輩企曬喺廁所門出面偷聽。

「我出嚟喇。」路千遙心事重重，直接返自己房。

「遙遙，佢唔會又遇到嗰啲嘢啊？都隔咗咁多年......」婆婆擔心噉問。

「我聽日放工試吓帶遙遙搵返當年嗰個師傅啊。」細姨安慰自己嘅父母。

[薯皮]

喺連登post真係煩，冇得返轉頭改
等甩P先再post嗰邊

[薯皮]

「得到不明怪病嘅人數持續上升，因源頭不明，政府決定所有學校由明日開始停課......」

「好耶！」王樂怡見可以提早放假，心情好興奮。

「係啊......」見到好朋友無憂無慮，路千遙內心好羨慕。如果不明怪病呢件事同佢冇關，佢而家應該同其他同學一樣，為提早放假而興奮。

雖然不明怪病爆發嘅群組主要係高官同黑警，但都有害到一啲無辜嘅人。路千遙心情複雜，雖然內疚，但而家嘅影響已經太大，好難去收拾。

放學返屋企嘅途中經過籃球場，見到一個熟悉嘅身影，自己一個人打籃球。

「喂！溫皓陽！」路千遙喺遠處大聲同佢打招呼。

上兩次見溫皓陽都係啲緊急情況，估唔到而家會咁啱撞到。路千遙諗返起佢講過嘅奇怪說話，覺得佢應該知道啲嘢。

男仔嗍住氣，轉頭望向路千遙。日落橙紅色嘅陽光照喺佢清秀嘅五官，汗水閃爍住光芒，有種虛幻嘅感覺。

「溫皓陽！」路千遙跑到男仔面前。

「上次你又粒聲唔出走咗，我好擔心你啊。」路千遙講嘅上次，係指撞到四腳獸嗰晚。

嗰晚溫皓陽為咗保護佢，幫佢引開怪物。當佢再返去殘廁，已經搵唔到溫皓陽嘅身影，都唔知佢有冇受傷或者出事。而家見溫皓陽啲手手腳腳齊晒，企喺佢面前，終於可以鬆一口氣。

男仔因為打籃球而整高衫袖，佢外露嘅手臂依然有大量嘅傷痕。見到類似野獸一樣嘅深刻抓痕，路千遙睇到都覺得痛，忍唔住倒吸一口氣，然後問男仔：「嘶......啲傷口係上次整到？你完全冇處理包紮啊？」

「你唔痛咩？」路千遙衰多手，想摸一摸個傷口。見男仔都冇去避開，就大擔噉近距離觀察，然後問：「你話啲傷口過咗幾日再包紮仲有冇用啊喇？」

「溫皓陽？」路千遙見男仔一直都冇應佢，開始覺得奇怪。

眼前嘅男仔望住路千遙嘅眼神好陌生，都好冷淡。直覺話畀佢聽，男仔根本唔識佢，只係默默聽自己講嘢。

路千遙本身就有少少臉盲症，同溫皓陽又只係見過兩次面。對佢塊臉嘅印象都好模糊，一時間都懷疑自己認錯人。

「呃......係我認錯人？」路千遙有啲唔確定噉反問對方。

對方身上嘅傷痕的確似係嗰晚被四腳獸整傷，自己應該冇認錯先啱。但睇對方嘅反應，又好似完全唔識自己。

「上次係幾時？」男仔冇正面答路千遙嘅問題，反而開始追問佢。

「幾......幾日前......」路千遙突然被追問，有啲忐忑不安。

「發生咩事？」男仔面冇表情，睇起嚟好恐怖。

「你發生事就真啊！被四腳獸撼親個腦啊？」路千遙見佢噉冇禮貌，就鼓起勇氣反駁佢。

「哼！」男仔冷笑咗一聲，然後黑起塊臉，對路千遙講：「呢種方式去引我注意，幼唔幼稚啲啊？」

[親衛隊]

@薯皮

[薯皮]

@親衛隊 當休息段時間，更慢少少
最近得閒就掛住打機同睇動漫，懶得更新

[親衛隊]

@薯皮 笑下你話連登冇得改（連登冇得改post、用頭像一年計埋應該慳唔少錢 ），呢邊遠古時期都討論過唔俾人改

[薯皮]

@親衛隊 我覺得呢度又少咗人，好悶

[親衛隊]

@薯皮 我最近上線都係pm爲主（佢哋做乜唔出嚟講嘢就唔知喇），見到得意嘢就覆下

[親衛隊]

@薯皮 大家好怕醜

[薯皮]

@親衛隊
最緊要係出咗咩事或者自爆咗身份，刪ac方便借

[薯皮]

@親衛隊
熱情啲我唔介意
雖然我都好怕羞

[薯皮]

@親衛隊 多人pm你

[親衛隊]

@薯皮 我都係隔日覆....

[薯皮]

@親衛隊 不過我都係掛住做其他嘢