• Citi

    https://cantonesemuseum.blogspot.com/2018/12/blog-post.html

    廣東話[最多鬼嘅歌]

    https://youtu.be/9696eNDwopU

    人對[鬼]一般都好忌諱,一般解釋係[人]死咗之後留低嘅靈體,又叫鬼魂、亡靈、亡魂、幽靈、幽魂,等等。有啲恐佈啲嘅叫邪靈、鬼怪、妖怪、魔鬼、吸血鬼等,總之鬼喺人嘅心目中總係面目猙獰、陰森恐佈嘅。但係廣東人講嘅[廣東話]入面用嘅鬼字就多不勝數,變化多端,主要係甪嚟做助語詞嘅[虛詞],純粹係加強語氣,冇咩實質意義嘅。

    喺部份帶有[鬼]字嘅詞語度,如果將個[鬼]字省略,佢哋嘅意思係完全冇變過嘅,例如:黐鬼線、死鬼咗、激鬼死、麻鬼煩、把鬼火........等等。不過,加上個[鬼]字之後嘅構詞,大部份都生動傳神咗好多,如果轉用官話嘅[書面語]嚟表達,說話嘅準確度就好難達到,會遜色好多架。

    [歡迎提供修正]

    **

    [最多鬼嘅歌]

    alt text

    《天才與白癡》
     作曲:許冠傑 作詞:許冠傑/薛志雄

    呢個世界上,有精仔、有懵仔、有叻仔、散仔、賭仔、重有戇居仔,
     有衰仔、有好仔、反骨仔、癲仔、蠢仔重弊過敗家仔,
     細蚊仔、臭飛仔、招卿仔、靚仔、打仔亂咁出刀仔,問你點敢亂生仔。
     邊個係天才[天才],邊個係白癡[白癡],
     扮懵定蠢才,冇咁易會知[阿茂至知],
     天才與白癡,你黐定我黐,天才與白癡,冇咁易會知,天才與白……癡。
     
     呢個世界上,有冤鬼、有嘩鬼、有奸鬼、賭鬼、盞鬼、重有鹹濕鬼,
     有衰鬼、有煙鬼、攝青鬼、生鬼、撞鬼撞著個冒失鬼,
     醉酒鬼、吊靴鬼、醜死鬼、假鬼、真鬼、亂咁鬼打鬼,問你究竟攪乜鬼。
     乜鬼係天才[天才],乜鬼係白癡[白癡],扮懵定蠢才,冇咁易會知,
     天才與白癡,你黐定我黐,天才與白癡,冇咁易會知,天才與白……癡。

    呢個世界上,有堅嘢、有流嘢、有精嘢、喎嘢、喳嘢、重有大鑊嘢,
     有衰嘢、有好嘢、有筍嘢、貴嘢、賤嘢、最驟忌就賴嘢,
     醒胃嘢、林嬸嘢、正斗嘢、靚嘢、傑嘢、最爽就撈粗嘢,確係認真唔少嘢。
     乜係天才[天才],乜係白癡[白癡],扮懵定蠢才,冇咁易會知,
     天才與白癡,你黐定我黐,天才與白癡,冇咁易會知,
     天才與白癡,天才與白癡,天才與白癡。

    **

    。鬼
    意思係指人死咗之後無咗個身,只係留低落嚟嘅靈魂。有啲人又認為[鬼]係生物死亡之後遺留落嚟嘅靈體。

    。鬼咩

    。鬼佬、鬼婆
    比較學術嘅係指[高加索人],一般嘅就係形容啲西方人。廣東係最先接觸西方人同西方文化,廣東人嘅觀念認為西方人全部都係紅鬚綠眼,所以就叫佢哋做[鬼佬],連帶西方女人就叫[鬼婆]。喺以前,呢啲詞語係帶有貶意,但喺依家,好多西方人都已經唔係好介意,有好多都會加上笑容而自稱做[鬼佬]、[鬼婆]添。

    。鬼妹、鬼仔
    西方人嘅大人就叫[鬼佬]、[鬼婆],咁佢哋嘅細路咪叫做[鬼仔]同[鬼妹]囉。

    。鬼妹仔
    唔係解鬼妹有個仔,而係泛指曾到過外國留學或者喺外國長大嘅女仔,佢哋性格好似外國人咁比較開放,唔會太介意啲凡文俗節咁啫。

    。鬼馬
    意思唔係一隻做咗鬼嘅馬,廣東話嘅意思係機智、有小聰明、狡猾、多怪主意、靈巧、古靈精怪等等。

    。鬼鬼馬馬

    。鬼馬雙星
    喺1974年,許冠文自編自導,同細佬許冠傑拍檔演出嘅喜劇片名,重有埋首主題歌添。
     [曲/詞:許冠傑]
     為兩餐乜都肯制前世 撞正輸曬心翳滯無謂
     求望發達一味靠搵丁 鬼馬雙星綽頭勁
     亂搏蒙撈偏門確唔曳 做慣監躉經已系成例
     求望發達一味靠搵丁 鬼馬雙星眼瞏瞏
     人生如賭博 贏輸都無時定
     贏咗得餐笑 輸光唔駛興
     做老千梗好搵過皇帝 扮蟹賴野真正系滑稽
     求望發達一味靠搵丁 鬼馬雙星怕現形
     求望發達一味靠搵丁 鬼馬雙星眼瞏瞏
     人生如賭博 贏輸都無時定
     贏咗得餐笑 輸光唔駛興
     做老千梗好搵過皇帝 扮蟹賴野真正系滑稽
     求望發達一味靠搵丁 鬼馬雙星
     鬼馬雙星 鬼馬雙星
     唔…真系有型嘅唧

    。鬼整
    意思係強調一啲一塌糊涂嘅嘢,好像畀鬼整蠱一樣。通常喺畀人整蠱之後,用嚟鬧啲捉弄你嘅人。借鬼嚟責備對方,不過責備嘅意思就唔係好強烈嘅。
    例如:[鬼整你咩?]

    。鬼打鬼
    意思係內訌、自己人打自己人,多數係指啲壞人。

    。鬼畫符
    意思係胡亂塗抹,好似鬼畫嘅符咒,通常用嚟形容字體寫得潦草而難以辨認嘅字。

    。鬼頭
    從前香港警隊入面稱呼啲洋人警官做[鬼頭]。

    。鬼頭仔
    原本係指以前香港警隊入面可以用英文直接同洋人警官[鬼頭]溝通嘅華人。後來就泛指嗰啲打小報告嘅人、奸細等之類。

    。鬼頭鬼腦
    意思係形容人陰險狡詐,行為舉止詭祕,同[鬼鬼祟祟]相似。鬼頭鬼腦可以用嚟形容人嘅長相,而鬼鬼祟祟就唔可以。

    。鬼食泥
    意思係話人一直喺度喃喃自語、喋喋不休,而講嘅嘢又含糊不清,依依哦哦,唔知佢噏啲乜。

    。鬼食泥咁聲
    聽過人講,傳說話有一隻窮鬼,因為在生嘅親人冇錢燒香燭畀佢,佢冇得食,只好食泥。而啲泥實在又好難吞,隻窮鬼只好喺個口度一直嘴嚼,就一直發出[依依哦哦]嘅聲音。

    。鬼都怕
    意思係指連鬼遇上都怕,形容好難應乎,令人頭痛。
    例如:[人唔要面鬼都怕],[窮到連鬼都怕].........

    。鬼都驚

    。鬼都唔怕/鬼都唔驚

    。鬼都好驚/鬼都好怕

    。鬼上身
    上身,意思就係[附體],鬼上身,即係人嘅軀體畀靈體附身,畀佢暫時控制著,而之後又講出或做出同平常唔一樣嘅言行舉止。

    。鬼知咩
    咩,意思係[什麼],係[乜嘢]兩字合音而成。鬼知咩嘅意雖近似[邊個知道],除咗有[邊個知]嘅意思外,重強調人唔知道,鬼先知曉。
    例如:[荔枝我就知,黎姿我鬼知咩!](黎姿,靚女嚟架!)

    。鬼唔知咩

    。鬼掹腳
    掹,即係[拉],係話有鬼拉腳,通常係形容人匆匆忙忙,好急趕著去某個地方,就好似畀鬼拉著走咁。

    。鬼掩眼/鬼黯眼
    明明就喺眼前就係睇佢唔到,就好似畀鬼遮著眼一樣,意思相近[鬼迷心竅]。

    。鬼鼠
    意思係閃閃縮縮,偷偷摸摸,唔見得光,同[鬼鬼祟祟]。

    。鬼鬼鼠鼠
    形容人做事唔夠光明正大,同[鬼頭鬼腦]相似。鬼鬼鼠鼠可以指唔易察覺嘅行為,而鬼頭鬼腦就唔得。

    。鬼殺咁嘈
    形容吵吵鬧鬧,高聲叫嚷,大發牢騷。隻鬼被殺時,係咪喧嘩得咁犀利,就真係不得而知嘞。

    。鬼五馬六
    形容古靈精怪,調皮狡猾,令人唔能夠理解,亦有亂七八糟嘅意思。

    。鬼咁靚
    形容人好靚,有幾靚?咪[鬼咁靚]囉。佢嘅比較級形容詞係[靚過鬼]。

    。鬼咁得意

    。鬼咁好食
    同[鬼火咁靚]相似,都係比較級形容助語詞,意思就係非常好食、好好食。

    。鬼火

    。把鬼火
    alt text

    。鬼火咁靚
    即係非常之靚,同[鬼咁靚]一樣意思。係比較級形容助語詞,冇鬼怪嘅意義。用呢個模式組成嘅詞句,標題係[鬼咁?]、[鬼咁??]等,都係咁嘅解釋,呢啲都係地道廣東話嘅講法。
    例如:[鬼咁醜]、[鬼咁衰]、[鬼咁蠢]、[鬼咁叻]、[鬼咁勁].........
       [鬼咁多事]、[鬼咁無聊]、[鬼咁賤格]、[鬼咁消魂]等等.........

    另外,又有標題調轉係[咁鬼?]、[咁鬼??]等,意思大致相同。不過就比較有蔑視或者鄙視嘅意味。
    例如:[咁鬼靚]、[咁鬼賤]、[咁鬼豬]、[咁鬼流]、[咁鬼急].........
       [咁鬼麻煩]、[咁鬼得閒]、[咁鬼衰格]、[咁鬼風騷]等等.........

    。鬼影無隻
    意思係一個影都冇,呢句嘢表面上講[鬼],其實係話[人],即係冇半個人影。

    。鬼影重重

    。鬼拍後背枕
    意思係指明明唔承認嘅嘢,唔知點解神不守舍咁,將自己嘅心底話講咗出嚟,招認晒,好似畀鬼喺腦後面操控著一樣。

    **

    。走鬼
    意思唔係一隻周圍走嘅鬼,幾十年前[走鬼]喺香港幾乎係人都知。嗰時啲小販違法擺檔時,為要避開唔好俾市政食環同警察拉而互相通報嘅暗語。

    。走鬼檔
    意思指嗰啲冇牌嘅流動小販,係由[走鬼]引申出嚟嘅[冇牌小販]代名詞。

    。衰鬼
    意思亦唔係一隻好衰嘅鬼,一般係喺[打情罵俏]嘅時候用嘅,或者係比較親昵嘅人用嚟打招呼,近似北方話嘅[冇心肝的;冇良心]。
    例如:[你個衰鬼,咁耐都唔嚟睇下我。]

    。衰鬼痘
    舊時嘅人有用[衰鬼痘]或者[衰鬼豆]呢個詞嚟形容人嘅,意思同[衰鬼]一樣,[衰鬼痘]已經被淘汰咗好奈。

    。盞鬼
    意思係有趣、風趣、得意、過癮、可愛、滑稽,等等。
    例如:[佢講嘢幾盞鬼嘅啫。]

    。冤鬼
    本義係[枉死而成]嘅鬼魂。但係多數人都係指成日[纏著人唔放]嘅人。

    。冤鬼氣
    冤氣,係解因為受冤枉而產生嘅冤枉氣;冤鬼氣,係指對人黐纏唔放嘅意思。
    例如:[您真冤鬼氣嘅啫。]

    。冤氣鬼
    意思同[冤鬼]一樣。
    例如:[你唔好跟住我呀,算我怕咗你隻冤氣鬼嘞。]

    。撞鬼
    正解係[遇到鬼魂]。廣東話[撞鬼]係用嚟鬧人近似[見鬼],有感嘆自己倒霉、行衰運、邪門等嘅意思。
    例如:[撞鬼你咩!撞到我碌地。],[今日真係撞鬼,跌咗個荷包。]

    。嘩鬼
    嘩,係指嘈吵、喧嘩;嘩鬼,純係指調皮、吵鬧、搞搞震嘅細路或者後生仔。
    例如:[成班嘩鬼,嘈喧巴閉!]

    。搞鬼
    意思係暗中使用詭計[搞詭計]。

    。搞乜鬼
    乜,係[什麼]嘅意思,搞乜鬼,就係[搞什麼鬼]嘅意思,同鬼冇乜關係。

    。搞咩鬼[咩鬼都有]

    。整鬼

    。整乜鬼/整咩鬼

    。醜死鬼
    醜,係表示唔好睇,唔光彩,可恥等等。醜字重有[羞]同[臊]嘅意思,即係害羞、羞怯、難為情、唔好意思等。
    例如:[鬼唔知醜],[真係醜死鬼].........

    。孤寒鬼/孤鬼寒
    就係一毛不拔嘅[吝嗇鬼]。廣東話[孤寒]係解[吝嗇]。

    。吊靴鬼
    原本係形容喜歡跟著人尾行嘅鬼,通常畀人跟尾都會感覺得到,但係擰轉頭又乜都冇。好廳啲就同[寃氣鬼]差唔多,衰啲講就話佢係[跟尾鬼/跟尾狗]之類。

    。為食鬼
    為食,即係[饞嘴],為食鬼就係[饞嘴鬼],可以理解為貪食嘅鬼。鬼字只係個助語詞,冇咩實質意義。

    。奀過鬼
    奀,係瘦小、單薄嘅意思,而鬼相傳係唔會再大,好單薄,容易畀風吹走。奀過鬼就係話睇起來又瘦又矮,外形唔討好,比鬼重輕、重細,細到極嘅意思。又可以用[好奀]嚟形容少得可憐。

    。大頭鬼
    意思係形容嗰啲有財有勢嘅人。

    。充大頭鬼
    就係話嗰啲無財無勢嘅小人物,但佢哋又冒充有財有勢,同[打腫塊面扮肥佬]嘅意思相同。

    。大嘥鬼
    意思係指浪費嘢嘅人。

    。老鬼

    。老友鬼鬼
    係好朋友嘅加重親切詞,未知源頭。

    。隔夜油炸鬼
    係一句歇後語[冇火氣]嘅前段,比喻完全冇脾氣。用油炸過嘅嘢都有火氣,但係程度會隨著時間而消減,油炸鬼隔咗一夜之後,就咩火氣都冇咗嘞。

    。懶鬼
    係指好懶惰嘅人。

    。鹹濕鬼/咸濕鬼
    你指好色嘅人。

    **

    。畀鬼磧
    呢個係[被鬼壓]嘅廣東話講法。意思係瞓到半夢半醒時,突然全身肌肉癱瘓,唔郁得,但係個腦就好清醒嘅睡眠障碍現象。就因為個腦清醒而郁唔到,恐懼就油然而生,潛意識就以為係俾鬼壓住而唔郁得。

    。扮鬼嚇人
    形容古古怪怪,裝神弄鬼,通常係畀識穿扮嘢之後嘅鬧人說話。

    。扮鬼扮馬
    意思係指人古古怪怪,裝模作樣,詼諧有趣之類。

    。扮鬼晒嘢

    。餓鬼投胎
    專門用嚟形容嗰啲食嘢係急不及待,狼吞虎嚥嘅人,好似畀[餓鬼]投胎轉世嚟咁。

    。水鬼升城隍
    形容人事上嘅特殊升遷,由低微驟升至高貴嘅身分地位。同[山雞變鳳凰]相近。但係比佢有更多嘅貶意。

    。呃鬼咩
    形容對人嘅說話極唔信任嘅同義詞,用嚟揭穿一啲好明顯同好容易識破嘅呃人講法。

    alt text

    。呃鬼食豆腐
    其實意思即係[呃鬼]。有個傳說,話從前有隻好耐冇食人嘅鬼潛入到書生屋企,想食個書生。個書生面不改容就同隻鬼講:[我已經好多日冇沖涼嘞,我啲肉又酸又臭,唔好食架。不如你食個煲入面嘅豆腐啦,豆腐比我啲肉嫩得多啦。]呢隻鬼好蠢,信晒書生講嘅嘢,果然放過佢而食晒個煲入面嘅豆腐。第二日,嗰書生將佢嘅經歷再加油加醋講畀啲村民知。嗰啲村民就話:[你啊,真係連鬼都畀你呃到唔食人,改食豆腐。]

    。氹鬼食豆腐
    [呃]同[氹]雖然一樣有欺騙嘅意思,但係亦有分別,[氹]嘅程度同[呃]嘅唔一樣,[氹細路仔]就唔等於[呃細路仔]。

    。人細鬼大
    意思係年紀細而頭腦精明,鬼主意多,為人機靈;形容人年紀唔大,但係識得大人嘅事,不過始終略帶貶意。

    。做乜鬼嘢/做乜鬼啫

    。關你鬼事

    文:蕭南仁。2018年12月

    **

    《萬水千山總是情》

    https://youtu.be/fuACA72PssE

    美國女歌手[唐伯虎]用廣東話唱《萬水千山總是情》

    作詞:鄧偉雄 作曲:顧嘉輝

    莫說青山多障礙 
    風也急風也勁
    白雲過山峰也可傳情 
    莫說水中多變幻
    水也清水也靜 
    柔情似水愛共永

    未怕罡風吹散了熱愛 
    萬水千山總是情
    聚散也有天注定 
    不怨天不怨命
    但求有山水共作證

    未怕罡風吹散了熱愛
    萬水千山總是情
    聚散也有天注定
    不怨天不怨命
    但求有山水共作證
    未怕罡風吹散了熱愛
    萬水千山總是情
    聚散也有天注定
    不怨天不怨命
    但求有山水共作證

    但求有山水共作證
    但求有山水共作證

    我愛廣東歌。廣東話資料館

    **

    香港語文。廣東話資料館

  • 2
  • 2
  • 粵回現狀Q&A
    文化台

    24
  • 11
  • 28
  • 11
  • 2
  • 3
  • 31
  • 26