• Citi

    http://www.cantonese.asia/portal.php?mod=view&aid=822

    2016-2-22 15:31| 發佈者: highyun| 原作者: 謝主隆

    摘要: 廣東佛山古鎮係粵劇之鄉、武術之鄉,亦有「南國陶都」之美名,但都未夠呢句說話架勢:「行通濟,冇閉翳」。

    廣東佛山古鎮係粵劇之鄉、武術之鄉,亦有「南國陶都」之美名,但都未夠呢句說話架勢:「行通濟,冇閉翳」。

    據說佛山城南有條洛水河,通濟橋橫跨河上,每年元月十六,鎮內居民會專程行過呢條橋,同時仲燒香、拋生菜兼轉風車,以圖一年順風順水。到今日,行通濟轉風車嘅習俗依然未變,不過時間就變成元宵之夜。

    151702cfe5yb2rqid0xdm2.jpg

    何解行通濟會冇閉翳?據說一來押韻兼意頭好,二來呢晚全家人齊齊趁吓熱閙樂得開心,閉翳盡消……當然另有傳說,無謂複述。查實,「行通濟,冇閉翳」呢句說話蘊藏嘅粵語元素更值得探討。

    首先係個「行」字。粵語「行」即係走(walk),而「走」係「跑,逃跑」。元宵之夜嚟到通濟橋上,當然係慢慢踱步欣賞橋上橋下風光,既然唔係被人追數,何必要「走」?再者,每逢元宵,此橋附近方圓數里必定「迫爆」,想「走」都「走」唔喐。

    151756tk8klk8asj66za8a.jpg

    「閉翳」先係成句嘅精華。有正字學者認為「閉翳」本字應該係「贔屭」。根據神話傳說,龍生九子:贔屭[備戲]、螭[雌]吻、蒲牢、狴犴[必岸]、饕餮[滔鐵]、蚣蝮[公福]、睚眥 [崖字]、狻猊[酸危]、椒圖,此九子皆唔似龍,各有唔同。其中贔屭又名「蟲八 蟲夏[霸夏]」,貌似海龜,最叻孭重嘢。傳說贔屭喺上古時代時常孭住三山五嶽喺江河湖海興風作浪,危害民間,後嚟大禹治水時收服咗佢,佢就服從大禹嘅指揮,推山挖溝,疏遍河道,爲治水貢獻良多。水治好之後,大禹擔心贔屭唔聽話,於是就搬咗塊頂天立地嘅特大石碑磧住佢,磧到佢喐不得其正,只能固定喺一度。後嚟,此神獸逐漸擺脫「閉翳」之汚名,現已成爲長壽及吉祥嘅象徵。好多古跡勝地嘅石碑,基座都做成一隻類似龜嘅物體,正係傳說中嘅「贔屭」。

    151814jo42xoul1ool2io4.jpg

    呢鋪話法雖則有些少牽強附會,但又幾得意,信不信由你。時下講嘅「閉翳」又應作何解?Beyond嘅《畀面派對》有答案:「明日富貴與閉翳,也要靠你畀吓面」,可見閉翳係富貴嘅反面。「翳」者,個心有壓抑感而唔舒服,「閉翳」即係憂愁,煩悶咁解,近義詞有「翳悶」、「翳滯」。令人心煩嘅又何止係貧窮?身體抱恙、事業低迷、家宅不安、社會動蕩,冚唪唥係閉翳事。「冇閉翳」實際係心想事成,合家安康嘅美好願望。

    有樣嘢值得欣喜,「行通濟,冇閉翳」呢句說話,伴隨住行通濟嘅民間傳統,得以原汁原味保存。若然今後某日,佛山人嘅後代要講「走通濟,沒煩惱」,嗰陣時廣府文化嘅境况就認真令人閉翳!

  • Citi @sudo

    @sudo行通濟 冇閉翳 入面講:

    「閉翳」即係憂愁,煩悶咁解

    中文/粵語入邊唔少呢種用兩個表示動作嘅字組成名詞或形容詞,比如
    舉措、含蓄、https://xsden.info/post/11645

  • Citi @恆智德

    @恆智德行通濟 冇閉翳 入面講:

    中文/粵語入邊唔少呢種用兩個表示動作嘅字組成名詞或形容詞

    呢兩個表示動作嘅字意思一般相關
    噉睇「閉翳」寫成「蔽翳」會更合理:

    【廣雅】翳,障也。【廣韻】隱也,蔽也。
    https://www.zdic.net/hant/翳

    兩個字都表示「遮蔽」,好容易就聯想到愁雲慘淡,遮天蔽日