何謂「行路上廣州」? 仲有半橛係粗口

  • Citi

    http://www.cantonese.asia/portal.php?mod=view&aid=782

    摘要: 講開行路,年長者實曉講一句「行路上廣州」。實在「行路上廣州」係句粗鄙話,全句為……

    廣東話「搭11號車」即係行路咁解,皆因「11」似兩隻腳。講開行路,年長者實曉講一句「行路上廣州」。實在「行路上廣州」係句粗鄙話,全句為「戇鳩鳩 行路上廣州」。舊時講過「戇鳩鳩 食豐收」,查實兩句話有冇關係?關係就冇,不過兩句重點都係前半橛,都係話人愚蠢。

    相傳呢句俗語源自民國時期嘅省港大罷工。時維民國十四年六月,香港十幾萬工人舉行大罷工,聲明擁護上海工商學聯合會提出嘅十七項條件,並提出香港市民有政治自由、法律平等、普遍選舉、勞動立法等六項要求(咦!咪仲激過家下多多聲!)。港英當局實行緊急戒嚴同封鎖,對付罷工,引起罷工民眾憤怒,紛紛離港到廣州。港英政府初時態度強硬,下令九廣鐵路停駛,故此離港工人多數只能以步行方法返回廣州。

    212824vt66bl8n8dujbby8.jpg

    本來,交通工具尚未發達嘅上世紀二三十年代,以步行方式返廣州甚至更遠嘅地方,係閒過立秋嘅事,但有人笑呢班工人俾政客煽動利用,做咗人棋子都唔知,相當戇居,故此以「戇鳩鳩,行路上廣州」呢句說話嘲笑佢哋。之不過咁,今時今日,步成為健康悠閒嘅活動,香港人仲每年都舉辦「行路上廣州」,一家大細,步行回鄉,樂也融融。

    212849yksq2nwznmxz028m.png

    順便提提個「上」字,正所謂「北上南下」,故此香港人北上,無論廣州、東莞、深圳,都係「上」,不過去東莞,而家興講「向西」。


  • @sudo何謂「行路上廣州」? 仲有半橛係粗口 入面講:

    故此香港人北上,無論廣州、東莞、深圳,都係「上」,不過去東莞,而家興講「向西」

    明嘅自然明 :lomore-brain:
    電影都有《一路向西》,Due West